بۇل تۋرالى وبلىستىق اۋىل شارۋاشىلىعى باسقارماسىنىڭ ۆەتەريناريالىق مونيتورينگ جانە ەسەپتىلىك ءبولىمىنىڭ باسشىسى نۇركەن بوياروۆ مالىمدەدى, دەپ حابارلايدى Egemen.kz اتىراۋ وبلىسى وڭىرلىك كوممۋنيكاتسيالار قىزمەتىنە سىلتەمە جاساپ.
قازاقستان رەسپۋبليكاسىنىڭ «جانۋارلارعا جاۋاپكەرشىلىكپەن قاراۋ تۋرالى» زاڭى 2022 جىلدىڭ 2 ناۋرىزىنان باستاپ كۇشىنە ەنۋىنە بايلانىستى, قاڭعىباس يتتەردى قاماپ, جويۋ جۇمىستارى توقتاتىلعان بولاتىن.
الايدا, اتالعان ماسەلە وڭىردە وزەكتى بولۋىنا بايلانىستى, اتىراۋ قالاسى اكىمدىگى مەن بارلىق اۋىلدىق وكرۋگتەردە قاڭعىباس يتتەردى اۋلاۋ جۇمىستارى ۇيىمداستىرىلادى.
- قازىرگى تاڭدا مەملەكەتتىك ساتىپ الۋ كونكۋرستارى جاريالانىپ, مامىر ايىنىڭ سوڭىنا دەيىن وتكىزىلەتىن بولادى. جەڭگەن مەردىگەر مەكەمە بارلىق جۇمىستى ۇيىمداستىرادى. ال, يتتەردى تىرىلەي اۋلاۋ جۇمىستارى وسى جىلدىڭ 20 مامىرىنان باستاپ جۇرگىزىلەدى. كەيىن اۋلانعان يتتەر ارنايى پاناجايعا ورنالاستىرىلادى, - دەدى ن.بوياروۆ.
سونداي-اق ونىڭ ايتۋىنشا, يتتەردى تاماقتاندىرۋ, تازالىق جانە ەكپە جۇمىستارىنىڭ بارلىعى كونكۋرستان ۇتقان مەكەمەنىڭ مىندەتىنە كىرەدى.
ال, اتىراۋ قالالىق ۆەتەرينارلىق ستانساسىنىڭ باسشىسى ساتىبالدى ورازعاليەۆ قازاقستاندا «جانۋارلارعا جاۋاپكەرشىلىكپەن قاراۋ تۋرالى» زاڭ 2 ناۋرىزدان باستاپ كۇشىنە ەنگەنىن, زاڭعا سايكەس اۋلانعاننان كەيىن ءۇيسىز جانۋارلار چيپتەۋگە, زالالسىزداندىرۋعا جاتاتىنىن ءمالىم ەتتى. الايدا, ولارعا جابايى, اگرەسسيۆتى جانۋارلار جاتپايدى. ونىڭ ايتۋىنشا, مەردىگەر ۇيىمدا جانۋاردىڭ اگرەسسيۆتىلىگىن انىقتايتىن كينولوگ بولادى. ال, باسقالارعا زيان كەلتىرۋى مۇمكىن جابايى جانۋارلار دارىلىك جولمەن جانسىزداندىرۋعا جاتادى.
ايتا كەتەيىك, بىلتىر وڭىردە 17 مىڭنان استام يت اتۋ ادىسىمەن جويىلعان.