وسكەمەن قالاسىنىڭ اكىمى جاقسىلىق ومارعا سوت شەشىمىن ورىنداماعانى ءۇشىن 159 مىڭ تەڭگە ايىپپۇل سالىندى, دەپ حابارلايدى Egemen.kz.
وسكەمەن اكىمى مەن قالالىق تۇرعىن ءۇي-كوممۋنالدىق شارۋاشىلىق بولىمىنە قاتىستى سوت ءىسى وبلىستىق مامانداندىرىلعان اۋدانارالىق اكىمشىلىك سوتىندا قارالعان. بەلگىلى بولعانداي, ابلاكەتكا كەنتىنىڭ تۇرعىندارى قوعامدىق كولىكتىڭ كەستەگە سايكەس قاتىنامايتىندىعىنا نارازىلىق ءبىلدىرىپ, سوت ارقىلى شاعىم تۇسىرگەن.
«اكىمشىلىك ءىس تاراپتاردىڭ داۋدى مەدياتسيا تارتىبىمەن رەتتەۋ تۋرالى كەلىسىمىن بەكىتۋ ارقىلى قارالدى. سول كەلىسىمگە سايكەس جولاۋشىلار تاسىمالىنا قاتىستى ماسەلەلەردى شەشۋ ءۇشىن اكىمدىكتىڭ جاۋاپتى بولىمىنە بىرنەشە مىندەتتەر جۇكتەلدى. ال سول مىندەتتەردىڭ ورىندالۋىن قالا اكىمى ءوز باقىلاۋىنا الۋعا ءتيىس بولعان», دەپ حابارلادى سوتتىڭ ءباسپاسوز قىزمەتى.
ياعني, اكىمدىك 16 ناۋرىزعا دەيىن اۆتوبۋستاردىڭ ۋاقتىلى قاتىناۋىن قامتاماسىز ەتۋگە ءتيىس ەدى. الايدا بۇل مىندەت ورىندالماعان.
«سوندىقتان ارپك-ءتىڭ 127-بابى 5-بولىگىمەن قالا اكىمى مەن تۇرعىن ءۇي-كوممۋنالدىق شارۋاشىلىق بولىمىنە 50 اەك نەمەسە 159 000 تەڭگە كولەمىندە ايىپپۇل سالىندى. ۇكىم ءالى زاڭدى كۇشىنە ەنگەن جوق», دەلىنگەن اقپاراتتا.
ايانا توعانبەك