قاپشاعاي قالاسىنا دىنمۇحامەد قوناەۆتىڭ ەسىمى بەرىلۋىنە بايلانىستى شاھاردا سالتاناتتى شارالار ۇيىمداستىرىلدى, دەپ حابارلايدى Egemen.kz.
«دىنمۇحامەد احمەت ۇلى قوناەۆ ەلىمىزدە 43 قالانىڭ سالىنۋىنا اتسالىستى. سونىڭ 7-ەۋى الماتى وبلىسىنداعى ەسىك, قاسكەلەڭ, سارقان, تالعار, ءۇشارال, ۇشتوبە, سوسىن وسى قاپشاعاي, ياعني قازىرگى قوناەۆ قالاسى. سوندىقتان, ءوزى سالدىرعان قالالاردىڭ بىرىنە اتىن بەرۋ – لايىقتى قۇرمەت كورسەتۋ دەپ بىلەمىز. مەملەكەت باسشىسىنىڭ باستاماسىمەن, قالا حالقىنىڭ قولداۋىمەن تاريحي ادىلەتتىلىك قالپىنا كەلتىرىلدى. قالانى قالىپتاستىرۋ, گەس پەن سۋ قويماسىن سالۋ – دىنمۇحامەد قوناەۆتىڭ تىكەلەي ەڭبەگى. سونىمەن بىرگە, پرەزيدەنتتىڭ جارلىعىنا سايكەس وبلىس ەكىگە بولىنگەننەن كەيىن الماتى وبلىسىنىڭ ورتالىعى - قوناەۆ قالاسى بولادى دەپ بەكىتىلدى. بۇل قالانىڭ دامۋىنا جاڭا سەرپىن بەرىپ, مەگاپوليستىڭ ماڭايىنداعى اۋدانداردىڭ قوردالانعان الەۋمەتتىك ماسەلەلەرىن ءتيىمدى شەشۋگە مۇمكىندىك جاسايدى», دەدى سالتاناتتى جيىندا ءسوز العان وبلىس اكىمى قانات بوزىمباەۆ.
وبلىس باسشىسىنىڭ ايتۋىنشا, الداعى ۋاقىتتا قوناەۆ پەن الماتى قالالارىنىڭ اراسىن سەرىكتەس قالالار جالعايدى. قازىر قاجەتتى ينفراقۇرىلىم جاسالعان, قالا ودان ءارى دە داميدى. بۇل رەتتە جوبانىڭ جاڭارتىلعان تۇجىرىمداماسىندا قالا ەكونوميكاسىنىڭ ونەركاسىپتىك, تۋريستىك, ويىن-ساۋىقتىق باعىتتارىن دامىتۋ قاراستىرىلعان. دەمەك, بيۋدجەت ءتۇسىمى مەن تارتىلاتىن ينۆەستيتسيا كولەمى ارتادى دەگەن ءسوز.
«قالاعا جاڭا اتاۋ بەرىلىپ, جاڭا مارتەبەگە يە بولۋى – وزگەرىستىڭ باسى. قازىردىڭ وزىندە تۇراقتى جۇمىس ورىندارىن اشۋ, تۇرعىن ءۇي قورىن كوبەيتۋ, قالانىڭ ينفراقۇرىلىممەن قامتىلۋى مەن كوركەيتىلۋىن كەشەندى تۇردە قاراستىراتىن جوسپار ازىرلەنىپ جاتىر. قالانىڭ ەكونوميكالىق, الەۋمەتتىك, مادەني, قاي جاعىنان بولسىن جاڭا تاريحى باستالدى دەپ سەنىممەن ايتۋعا بولادى. قوناەۆ قالاسىنىڭ تۇرعىندارى دا وزگەرىستەرگە بەلسەنە اتسالىسادى دەپ سەنەمىز», دەگەن قانات بوزىمباەۆ كوپشىلىكتى جەڭىس كۇنىمەن جانە قالا اتاۋىنىڭ اۋىسۋىمەن قۇتتىقتادى.
ايتا كەتەيىك, شاراعا مەملەكەت جانە قوعام قايراتكەرىنىڭ تۋعان-تۋىستارى, زامانداستارى مەن ارىپتەستەرى, پارلامەنت سەناتى مەن ءماجىلىسىنىڭ دەپۋتاتتارى, عىلىم مەن شىعارماشىلىق يەلەرى, ارداگەرلەر مەن جەرگىلىكتى تۇرعىندار قاتىستى. الدىمەن, قالانىڭ ورتالىق الاڭىنداعى د. قوناەۆ ەسكەرتكىشىنە گۇل شوقتارى قويىلدى. مۇندا الماتىداعى د. قوناەۆ اتىنداعى مۋزەي ەكسپوناتتارىنىڭ كوشپەلى كورمەسى ءوتتى. وندا دىنمۇحامەد احمەت ۇلىنىڭ جەكە زاتتارى مەن فوتوكورمە ورنالاستىرىلعان. شارا مەرەكەلىك كونتسەرتكە ۇلاستى.
ەسكە سالساق, قر پرەزيدەنتى قاسىم-جومارت توقاەۆ قازاقستان حالقىنا جولداۋىندا قاپشاعايعا قوناەۆتىڭ ەسىمىن بەرۋ كەرەك دەپ ۇسىنىس ايتىلسا, بۇل پىكىرگە قوسىلاتىنىن جەتكىزدى. قاپشاعاي قالاسىنا دىنمۇحامەد قوناەۆ ەسىمىن بەرۋ ۇسىنىسى ءبىراۋىزدان ماقۇلداندى. قاپشاعاي قالاسىنا قوناەۆ اتى رەسمي تۇردە بەرىلدى.