ۇلى وتان سوعىسىنىڭ مۇگەدەكتەرى مەن قاتىسۋشىلارى, تىل ەڭبەككەرلەرى جانە ەڭبەك مايدانىنىڭ قاتىسۋشىلارى تەمىرجول كولىگىمەن تەگىن جول جۇرە الادى, دەپ حابارلايدى Egemen.kz.
قازاقستان تەمىرجولى كومپانياسىنىڭ حابارلاۋىنشا, تەمىرجول كولىگىمەن تەگىن ءجۇرۋ 1935 جىلعى 31 جەلتوقسانعا دەيىن تۋىلعان ۇلى وتان سوعىسىنىڭ قاتىسۋشىلارى مەن مۇگەدەكتەرىنە, تىل ەڭبەككەرلەرىنە جانە ەڭبەك مايدانىنىڭ قاتىسۋشىلارىنا بەرىلەدى.
اتالعان قايىرىمدىلىق اكتسياسى «Samruk-Kazyna Trust» الەۋمەتتىك جوبالاردى دامىتۋ قورىنىڭ «جەڭىس» جوباسى اياسىندا ۇيىمداستىرىلدى.
«اكتسيا ماقساتى – قازاقستان رەسپۋبليكاسىندا تۇراتىن, 1935 جىلعى 31 جەلتوقسانعا دەيىن تۋىلعان ۇلى وتان سوعىسىنىڭ قاتىسۋشىلارى مەن مۇگەدەكتەرىن, تىل ەڭبەككەرلەرىن جانە ەڭبەك مايدانىنىڭ قاتىسۋشىلارىن الەۋمەتتىك قورعاۋ دەڭگەيىن ارتتىرۋ», دەلىنگەن حابارلامادا.بارلىق باعىتتاعى (تاۋەلسىز مەملەكەتتەر دوستاستىعى شەگىندە) پويىزداردىڭ كۋپەلىك ۆاگوندارىندا, سونداي-اق قالا ماڭى قاتىناسىنداعى پويىزداردا, «تۋريست» كلاستى ۆاگونداردا جانە «Talgo» كومپانياسىنىڭ ۆاگوندارىنان قۇرىلعان پويىزداردا مۇمكىندىگى شەكتەۋلى ادامدارعا ارنالعان مامانداندىرىلعان كۋپەدە تەگىن جول ءجۇرۋ كوزدەلگەن.
تەگىن جول ءجۇرۋ قۇجاتتارىن رەسىمدەۋ ءۇشىن «جولاۋشىلار تاسىمالى» اق بيلەت كاسساسىنا قازاقستان رەسپۋبليكاسى ازاماتىنىڭ جەكە باسىن كۋالاندىراتىن قۇجاتتى, سونداي-اق ۇلى وتان سوعىسىنا قاتىسۋشىنىڭ نەمەسە مۇگەدەگىنىڭ كۋالىگىن, تىل ەڭبەككەرى جانە ەڭبەك مايدانىنىڭ قاتىسۋشىسى رەتىندە ارنايى مەملەكەتتىك جاردەماقى تاعايىنداۋ تۋرالى ۋاكىلەتتى ورگاننىڭ بەلگىسى بار زەينەتاقى كۋالىگىن ۇسىنۋ قاجەت.
تمد ەلدەرىنە بارعان كەزدە تەگىن جول ءجۇرۋ ءۇشىن قۇجاتتارى قازاقستان رەسپۋبليكاسىنىڭ اۋماعىندا ورنالاسقان ساتۋ پۋنكتتەرىندە عانا رەسىمدەلەدى.
ناۋقان 2022 جىلدىڭ 30 ماۋسىمىنا دەيىن جۇزەگە اسىرىلادى.