ەڭ قىسقا وتكەن سەزد

ايمان مۇساقوجاەۆا قازاقستان مۋزىكا قايراتكەرلەرى وداعىنىڭ ءتورايىمى بولىپ سايلاندى

كەشە الماتىدا قازاقستان مۋزىكا قايراتكەرلەرىنىڭ وداعى كەزەكتەن تىس سەزد وتكىزىپ, ءبىر عانا ماسەلەنى كۇن تارتىبىنە شىعاردى. ويتكەنى, بۇل وداقتى 25 جىل بويى باسقارىپ كەلگەن كسرو-نىڭ حالىق ءارتىسى, كسرو مەن قازاقستان مەملەكەتتىك سىيلىقتارىنىڭ لاۋرەاتى, پروفەسسور ەرمەك سەركەباەۆ ومىردەن وزعانى بارشامىزعا ايان. وسىلايشا, ءبىراز ۋاقىت باسشىسىز قالعان وداقتىڭ بارلىق دەرلىك مۇشەسى دۇيسەنبى كۇنى جامبىل اتىنداعى قازاق مەملەكەتتىك فيلارمونياسىنا جينالىپ, ءبىراۋىزدان ەلگە بەلگىلى ونەر مايتالمانى ايمان مۇساقوجاەۆانى ءتورايىم ەتىپ تاڭدادى. وداق مۇشەلەرى داۋىس بەرگەنگە دەيىن كەزەكتەن تىس سەزدە وسى وداقتى قۇرىلعان كۇنىنەن باستاپ بىلەتىن, قازاق كسر-ءىنىڭ مادەنيەت ءمينيسترى بولعان, قازاقستاننىڭ ونەرىنە ەڭبەك سىڭىرگەن قايراتكەر جەكسەنبەك ەركىنبەكوۆ ءسوز الىپ, اتالمىش وداقتىڭ قۇرىلۋىنا توقتالدى. قازىرگى قازاقستان مۋزىكا قاي­­رات­­كەرلەرىنىڭ وداعى باس­تاپ­قىدا قازاق كسر-ءىنىڭ مۋزىكا­لىق قوعامى رەتىندە 1987 جىلى كسرو-نىڭ بۇكىلوداقتىق مۋزى­­كالىق قوعامىنىڭ قۇرى­لىم­دىق بولىمشەسى رەتىندە ۇيىمداس­تىرىلعان. ونىڭ باسشىسى كسرو-نىڭ حالىق ءارتىسى, سوتسيا­ليس­تىك ەڭبەك ەرى, لەنين جانە مەم­لە­كەت­تىك سىيلىقتاردىڭ لاۋرەاتى, اكادەميك يرينا ارحيپوۆا بولىپتى. تاۋەلسىزدىكتىڭ ەلەڭ-الاڭىن­دا, ياعني 1991 جىلى بۇل قوعام قازاقستان رەسپۋبليكاسى مۋزىكا قايراتكەرلەرىنىڭ وداعى دەپ قايتادان وزگەرتىلىپ, ونىڭ ءى سەزى سايلاۋىنىڭ قورىتىندىسى بويىن­شا باسقارما توراعاسىنا ايتۋلى تۇلعا ەرمەك سەركەباەۆ سايلانادى. سودان بەرى وداق ۇجىمى كاسىبي جانە ونەرپازدىق مۋزىكا ونەرىنىڭ بارلىق باعىتتارىندا بەلسەندى جۇمىس جۇرگىزىپ كەلەدى. ماسەلەن, سوڭعى بەس جىلدا اتالمىش وداق حالىقارالىق وپەرا جانە بالەت ونەرىنىڭ فەستيۆال­دەرىن, ونىڭ ىشىندە دج. ۆەردي­دىڭ 200 جىلدىعىن, ەل تاۋەلسىز­دىگىنىڭ 20 جىلدىعىن, «ەرمەك سەركەباەۆ شاقىرادى», پاۆلودار جانە اقتوبە قالالارىندا رەسپۋب­لي­كالىق حور فەستيۆالىن, الماتى قالا­سىندا رەسپۋبليكالىق كامەرا­لىق انسامبل مەن وركەستر فەستي­ۆالدەرىن وتكىزۋگە ۇيىتقى بولدى. سونىمەن, مۋزىكا قايرات­كەر­لەرىنىڭ كەزەكتەن تىس وتكەن سەزىن مادەنيەت ءمينيسترىنىڭ ورىنباسارى اسقار بورىباەۆ اشىپ: – وسىنداي اۋقىمدى جانە اسا ماڭىزدى شارانى وتكىزۋ ەلدىڭ جەتەكشى ۇجىمدارىنىڭ شىعار­ما­شىلىق بەلسەندىلىگىن ارتتىراتىن, مۋزىكانتتار مەن ورىنداۋشىلاردى ءبىر ورتاعا بىرىك­تىرەتىن بىرەگەي ءىس دەپ ساناي­مىن. بۇل ۇيىمدى 25 جىل­دان استام ۋاقىت قازاق كلاسسي­كالىق ونەرىنىڭ كوريفەيى ەرمەك سەركەباەۆ باسقاردى. وسى ارالىقتا ول مۋزىكانتتارىمىزدىڭ شىعار­ماشىلىق الەۋەتىن ارتتىرۋ مەن كاسىبي تۇرعىدا ءوسۋى ءۇشىن جان-جاقتى مادەني ساياسات جۇرگى­زىپ كەلدى. ەندىگى باسشىلىق تا وسى ۇردىستەن اينىمايدى دەگەن ويدامىن. ءبارىمىزدىڭ ورتاق ماقساتىمىز – وتاندىق مادەنيەت­تى, ورىنداۋشىلىق شەبەرلىكتى ەڭ جوعارى دەڭگەيگە جەتكىزۋ. بۇل جولدا ءبىز عالامات الەۋەتكە جانە مەملەكەت باسشىسىنىڭ قول­داۋىنا يەمىز, – دەدى ءمينيستردىڭ ورىنباسارى. سونىمەن, اتالمىش وداقتىڭ جاڭا باسشىسىن سايلاۋ ۇزاق ۋاقىت العان جوق. شىعارماشىلىق وداقتار جۇرگىزگەن سەزدەردىڭ ىشىندەگى ەڭ قىسقاسى بولدى. بەلگىلى سكريپكاشى, قا­زاق­ستاننىڭ حالىق ءارتىسى, حالىق­ارالىق شىعار­ماشىلىق اكادە­ميا­سى­نىڭ اكا­دەميگى ايمان مۇساقو­جاەۆانىڭ كانديداتۋراسى اتالىپ, وداق ءمۇ­شەلەرى ءبىر كىسىدەي داۋىس بەردى. بۇدان كەيىن مىنبەرگە وداق­تىڭ جاڭا سايلانعان ءتور­ايى­مى كو­تە­رىلىپ, وزىنە ۇلكەن سەنىم ارت­قان ارىپتەستەرىنە شىنايى العى­سىن ءبىلدىردى. وسىدان كەيىن وداق­تىڭ الداعى جوسپارلارى­نا قىس­قا توق­تالىپ, نەگىزگى با­عىت­تار­دى اتادى. – ەلباسى ايتقانداي, مادە­نيەت­كە مادەني ساياسات كەرەك. ءبىز وسى مادەني ساياساتتى قالىپ­تاستى­رۋىمىز قاجەت. مەن ءۇشىن الەم­د­ىك اۋقىمداعى جۇلدىز ەرمەك سەر­كەباەۆتىڭ ەڭبەگىن لايىقتى جال­عاستىرۋ – ۇلكەن مارتەبە! – دەدى ايمان مۇساقوجاەۆا. ايناش ەسالي, «ەگەمەن قازاقستان». الماتى.