الماتى قالاسىندا قازاقستان رەسپۋبليكاسى پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتى مەن قازاقستان سىرتقى ىستەر مينيسترلىگى ءبىرلەسە وتىرىپ, «قازاقستان رەسپۋبليكاسى سىرتقى ساياساتىنىڭ 2014-2020 جىلدارعا ارنالعان تۇجىرىمداماسى جانە ونىڭ جۇزەگە اسۋىنىڭ مىندەتتەرى» اتتى دوڭگەلەك ۇستەل وتكىزدى.
قازاقستان – تاۋەلسىز مەملەكەت رەتىندە قالىپتاسقان كەزدەن باستاپ الەمدىك قاۋىمداستىققا تۇراقتى ءارى قارقىندى دامۋشى ەل رەتىندە كەڭىنەن تانىلدى.
سوندىقتان دا جيىندا ىنتىماعى مەن بىرلىگى جاراسقان, حالىقارالىق قارىم-قاتىناسى مەن سىرتقى جاعدايلارعا وزىندىك ءۇن قاتقان قازاق ەلىنىڭ سىرتقى دۇنيەمەن ارالاسۋ, قاتىناس جاساۋ جانە ءوزىنىڭ ۇستانىمىن ناقتىلاۋ ماسەلەسى اڭگىمە ارقاۋىنا اينالىپ, مەملەكەتتىڭ كەلەشەكتەگى قادامى تياناقتى تۇردە پىسىقتالدى.
القالى جيىندا سىرتقى ىستەر ءمينيسترى ەرلان ىدىرىسوۆ بايانداما جاسادى. پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ باسشىسى بولات سۇلتانوۆ «عالامدىق جانە ايماقتىق جۇيەدەگى قازاقستان رەسپۋبليكاسىنىڭ سىرتقى ساياساتى», ال توتەنشە جانە وكىلەتتى ەلشى, ءسىم-ءنىڭ ەرەكشە تاپسىرمالار جونىندەگى ەلشىسى اقمارال ارىستانبەكوۆا «جاھاندانۋ جاعدايىنداعى قازاقستاننىڭ جان-جاقتى ديپلوماتيالىق قاتىناسى جانە الداعى مۇمكىندىكتەرى» دەگەن تاقىرىپتاردا بايانداما جاساپ, ەلىمىزدىڭ ۇستانعان ساياسي باعىتىن تولىق قامتيتىن ماعلۇمات بەرىپ ءوتتى. الىس-جاقىن 16 مەملەكەتتىڭ ەلشىلەرى مەن كونسۋلدىقتار وكىلدەرى قاتىسقان باسقوسۋدا, سونداي-اق, ستراتەگيالىق زەرتتەۋلەر ينستيتۋتىنىڭ عىلىمي باس مامانى ۆ.دودونوۆ, ابىلاي حان اتىنداعى قازاق حالىقارالىق قاتىناس جانە الەم تىلدەرى ۋنيۆەرسيتەتىنىڭ پروفەسسورى س.بولەكباەۆ, ءال-فارابي اتىنداعى قازاق ۇلتتىق ۋنيۆەرسيتەتى جانىنداعى قاۋىپسىزدىك ءجانە ىنتىماقتاستىق ماسەلەلەرىن زەرتتەۋ ينستيتۋتىنىڭ ديرەكتورى ك.بايزاقوۆ سالالىق تاقىرىپتار بويىنشا ءسوز الىپ, قاتىسۋشىلار ساۋالدارىنا جاۋاپ قايتاردى. دوڭگەلەك ۇستەل «قازاقستان رەسپۋبليكاسى سىرتقى ساياساتىنىڭ ماقساتى مەن العا قويعان مىندەتتەرى» جانە «قازاقستان رەسپۋبليكاسى سىرتقى ساياسي ستراتەگياسىنىڭ ايماقتىق مۇمكىنشىلىكتەرى مەن نەگىزگى ۇستانىمى» دەپ اتالعان ەكى بولىمدە جۇمىس ىستەدى.
ەلىمىزدىڭ سىرتقى ساياساتى ۆەدومستۆوسىنىڭ باسشىسى ەرلان ىدىرىسوۆ قازاقستان رەسپۋبليكاسىنىڭ 2014-2020 جىلدارعا ارنالعان سىرتقى ساياسات تۇجىرىمداماسى وزگە ەلدەرمەن بايلانىستى نىعايتۋعا باعىتتالعانىن, الداعى اتقارىلار نەگىزگى جۇمىس لاتىن امەريكاسى مەن افريكا ەلدەرىندە جاڭا بايلانىستاردى اشۋعا جۇمىلدىرىلاتىنىن اتاپ ءوتتى. مينيستردىڭ اتاپ وتكەنىندەي, قازاقستان رەسپۋبليكاسى سىرتقى ساياساتتاعى ءوزىنىڭ سىرتقى بايلانىستارىن كەڭەيتپەك. جاڭا تۇجىرىمداماعا سايكەس ەلىمىز لاتىن امەريكاسى, افريكا ەلدەرى سياقتى جاڭا ساياسي-ەكونوميكالىق بايلانىستاردىڭ پايدا بولۋىن قامتاماسىز ەتەتىن بولادى. «قازىر قازاقستاننىڭ وكىلدەرى برازيليادا جۇمىس ىستەپ جاتىر. بيىل ءبىز مەكسيكا مەن ەفيوپيادا ەلشىلىگىمىزدى اشامىز. بۇگىنگى تاڭدا كاريب باسسەينى مەن لاتىن امەريكاسى بىزگە جاقىنداي ءتۇستى. وسى ايماقتاردا ءبىز ەكونوميكالىق قارىم-قاتىناستاردى بارىنشا دامىتپاقپىز», – دەي كەلىپ مينيستر ەلىمىزدىڭ افريكا قۇرلىعىنا جىلجىپ بارا جاتقان جاھاندىق اعىستان سىرت قالا المايتىندىعىن, قازىرگى تاڭدا قازاقستان افريكانىڭ ءۇش تاراپىنان, اتاپ ايتقاندا, وڭتۇستىگى, ورتالىعى جانە سولتۇستىگى ارقىلى ساياسي-ەكونوميكالىق قاتىناستارىن جۇرگىزىپ وتىرعانىن, ونىڭ مىسالى رەتىندە مىسىر, وڭتۇستىك افريكا رەسپۋبليكاسىندا قازاقستاننىڭ ەلشىلىكتەرى جۇمىس ىستەپ تۇرعانىن اتاپ, بۇل باعىتتىڭ ەلىمىزگە ۇلكەن مۇمكىنشىلىكتەر اكەلەتىندىگىنە ەرەكشە توقتالدى.
قانات ەسكەندىر,
«ەگەمەن قازاقستان».
الماتى.