كوكشەتاۋدا «اقمولا بارىسى» ءتۋرنيرى ءوتىپ, ەڭ مىقتى پالۋان انىقتالدى, دەپ حابارلايدى Egemen.kz.
«اقمولا بارىسى» چەمپيونى اتاعىن كوكشەتاۋلىق پالۋان لەونيد ستانەەۆ جەڭىپ الدى. ەكىنشى ورىندى بۇلاندى اۋدانىنان كەلگەن الدابەرگەن تولستوي يەلەندى. ءبىرجان سال اۋدانىنىڭ وكىلى ەلۋان وسپانوۆ قولا جۇلدەگەر اتاندى», دەپ حابارلادى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتىنەن.
ۆەدومستۆودان اتاپ وتكەندەي, «اقمولا بارىسى» اتاعىنا يە بولعان پالۋانعا 1 ملن تەڭگە, ەكىنشى جانە ءۇشىنشى ورىن العاندارعا 700 جانە 500 مىڭ تەڭگەدەن اقشالاي سىيلىق بەرىلدى. اقمولا وبلىسىنىڭ ۇزدىك ەكى پالۋانى - لەونيد ستانەەۆ پەن الدابەرگەن تولستوي «قازاقستان بارىسى» رەسپۋبليكالىق تۋرنيرىندە اقمولا وبلىسىنىڭ نامىسىن قورعايتىن بولدى.
اقمولا وبلىستىق دەنە شىنىقتىرۋ جانە سپورت باسقارماسى ءباسپاسوز قىزمەتىنىڭ مالىمەتىنشە, جارىسقا وبلىستىڭ əر وڭىرىنەن كەلگەن 20 پالۋان قاتىستى. ولاردىڭ اراسىندا اۋەسقويلارمەن بىرگە كاسىپقويلار دا بار.
بوزكىلەمگە قازاق كۇرەسىمەن اينالىسىپ جۇرگەن پالۋانداردان بولەك, سامبوشىلار, دزيۋدوشىلار, سونداي-اق ەركىن جانە گرەك-ريم كۇرەس شەبەرلەرى دە شىقتى.