ءىلياس وماروۆ اتىنداعى قوستاناي وبلىستىق قازاق دراما تەاترىندا «الاشتىڭ احمەتى» سپەكتاكلىنىڭ پرەمەراسى ءوتتى. دراما-ەلەگيا جانرىنداعى ساحنالىق تۋىندى ۇلت ۇستازى احمەت بايتۇرسىن ۇلىنىڭ جەر تۇتاستىعى مەن ەل بۇتىندىگىن ساقتاپ قالۋ جولىنداعى جانكەشتى ەڭبەگى مەن ەلدىڭ ساياسي-رۋحاني تۇرعىدا ەڭسە تۇزەۋ جولىنداعى قايراتكەرلىگىن بەينەلەيدى.
قويىلىمدا الاش ارىسىنىڭ اياۋلى جارى ءبادريسافانىڭ اۋىر تاعدىرى مەن احاڭا دەگەن ازاپتى سۇيىسپەنشىلىگى, ەكەۋىنىڭ اراسىنداعى اينىماس سىيلاستىق پەن قۇرمەت سەزىمدەرى اسەرلى باياندالادى.
شىعارما اۆتورى – دراماتۋرگ-جازۋشى وتەن احمەت. قويۋشى رەجيسسەرى – قۋاندىق قاسىم. پرەمەرانى تاماشالاۋعا كەلگەن جۇرتتىڭ كوپتىگى سونشالىق, كورەرمەن زالىندا ينە شانشار ورىن قالمادى دەسەك بولادى. اكتەرلەر شەبەرلىكپەن سومداعان كوركەم بەينەلەر دە نانىمدى شىققان. احاڭ تۋرالى العاشقى قويىلىمدى ارنايى كەلىپ باستان-اياق كورىپ شىققان وبلىس اكىمى دە تەاتر قورجىنىنا تاعى ءبىر ءساتتى تۋىندىنىڭ قوسىلعانىن اتاپ ءوتتى.
– بۇگىنگى تاماشا قويىلىمدى ءوڭىر ساحناگەرلەرىنىڭ احاڭنىڭ رۋحىنا جاساعان تاعزىمى دەۋگە بولادى. احمەت بايتۇرسىن ۇلى مەن ءبادريسافانىڭ اراسىنداعى سۇيىسپەنشىلىك, سىيلاستىق سەزىمى, ۇلت ۇستازىنىڭ ەلگە دەگەن ماحابباتى, ءوز ىسىنە دەگەن ادالدىعى, حالقىنا دەگەن پەرزەنتتىك بورىشى وتە ءساتتى سومدالعان. سپەكتاكلدىڭ اۆتورى مەن قويۋشى رەجيسسەرگە, سونداي-اق تەاتردىڭ بارلىق شىعارماشىلىق ۇجىمىنا شىنايى العىسىمدى بىلدىرەمىن. ساحنادان ۇلكەن ەڭبەكتىڭ جەمىسىن كوردىك. بۇل – ءىلياس وماروۆ اتىنداعى وبلىستىق تەاتردىڭ احاڭنىڭ 150 جىلدىق مەرەيتويىندا ءوڭىر تۇرعىندارىنا جاساعان تاماشا تارتۋى, – دەدى ا.مۇحامبەتوۆ.
پرەمەرا وتكەن كۇنى تەاتردىڭ كىرەبەرىس دالىزىندە ۇلت ۇستازىنىڭ عىلىمي مۇراسى مەن ءومىر كەزەڭدەرىنەن سىر شەرتەتىن كورمە اشىلىپ, قالىڭ كورەرمەن احاڭنىڭ عۇمىرناماسىنا قاتىستى قۇندى ارحيۆ قۇجاتتارىمەن تانىستى.