ەل تىنىشتىعىن كۇزەتۋ – قاستەرلى مىندەت. وسى ءبىر ابىرويلى ىسكە جۇمىلعان ۇقك شەكارا قىزمەتىنىڭ ساي تاسىنداي جاس ساربازدارى وتان تىنىشتىعىن قورعاۋعا سالتاناتتى تۇردە انت بەردى.
ۇقك شەكارا قىزمەتىنىڭ الماتى وبلىسى بويىنشا دەپارتامەنتىنە قاراستى قاراساي اۋدانى, اقجار شاعىن اۋدانىندا ورنالاسقان كاسىبي-تەحنيكالىق جانە دايىندىق بولىمىندە وتكەن راسىمگە ساربازداردىڭ تۋىستارى قاتىستى. ءبىر ەرەكشەلىگى, جاس جاۋىنگەرلەر كۋرسىنان ءوتىپ جاتقان 400-دەن استام سارباز انت بەرگەن شارانى بۇكىل رەسپۋبليكا جۇرتشىلىعى تىكەلەي كورسەتىلىم ارقىلى تاماشالادى.
– مەن ءوزىمنىڭ قارۋلاستارىمدى بەرگەن سەرتىمىزگە ادال بولىپ, تاباندىلىقپەن, ەرجۇرەكتىكپەن بورىشىمىزدى وتەۋگە شاقىرامىن. انت قابىلداۋ – بارشامىز ءۇشىن ماڭىزدى كۇن. ەلىم دەيتىن ەر بولىپ, قايتپاس-قايسار ازامات اتانىپ, تەپسە تەمىر ۇزەتىن اسكەري ءومىردىڭ قيىندىعى مەن اۋىرتپالىعىنا شىدايتىن, كەز كەلگەن ۋاقىتتا قولىنا قارۋ الىپ, ەلىن قورعاۋعا دايىن, تۋعان جەرىنىڭ شەكاراسىندا جۇرەتىن ساربازدارعا اينالامىز, – دەيدى سالتاناتتى شارادا ساربازدار اتىنان تىلەك بىلدىرگەن قاتارداعى جاۋىنگەر نۇرسۇلتان ابىلاي.
ءار ساربازدىڭ ومىرىندە التىن ارىپپەن جازىلىپ قالۋعا ءتيىس ايتۋلى ساتتە شەكارا باسقارماسىنىڭ جاۋىنگەرلىك تۋى ورتاعا اكەلىنىپ, ەلىمىزدىڭ ءانۇرانى شىرقالدى. اتالعان باسقارمانىڭ باسشىسى پودپولكوۆنيك ن.بەردىباەۆ ساپقا تۇرعان ساربازداردى اتاۋلى مەرەكەسىمەن قۇتتىقتادى.
راسىمگە بۇدان بولەك, الماتى وبلىسى بويىنشا دەپارتامەنت باستىعىنىڭ ورىنباسارى پولكوۆنيك ا.مۇنالباەۆ, «زاستاۆا تارلاندارى» رەسپۋبليكالىق قوعامدىق بىرلەستىگى الماتى وبلىستىق فيليالىنىڭ توراعاسى زاپاستاعى پولكوۆنيك الەكساندر دۋبوۆ, اۋعان سوعىسىنىڭ ارداگەرلەرى, زاپاستاعى پولكوۆنيكتەر: گريگوري كۋليكوۆ, جەڭىسبەك سۇلەيمەنوۆ, بولات قۇرامىسوۆ, ناۋرىزباي باتىر اۋدانى قورعانىس ىستەرى بويىنشا دەپارتامەنتى باستىعىنىڭ ورىنباسارى زاپاستاعى مايور ەرجان الينوۆ, سونداي-اق شەكاراشى ارداگەرلەر مەن ناۋرىزباي اۋدانى اكىمدىگىنىڭ وكىلدەرى قاتىستى.