قازاقتىڭ قولداۋشىسى دا, قامقورشىسى دا – قازاق. ەستە جوق ەسكى زاماننان بەرى جەسىرىن دە, جەتىمىن دە جىلاتپاعان حالىقتىڭ بۇگىنگى ۇرپاعى سول ءۇردىستى جالعاستىرىپ كەلەدى.
ايلاردىڭ سۇلتانى – رامازانداعى قادىر ءتۇنى قارساڭىندا جىلىوي اۋدانىنىڭ مۇنايشىلارى اسىراۋشىسىنان ايىرىلعان وتباسىعا قايىرىمدىلىق كومەك كورسەتتى. ولار اۋدان ورتالىعى – قۇلسارى قالاسىندا تۇراتىن كوپبالالى انا نۇرگۇل عابدولوۆاعا ەكى بولمەلى پاتەر ساتىپ الىپ بەردى. شىندىعىندا بەس بالاسى بار انا مۇنداي كومەككە ءزارۋ ەدى. ونىڭ كۇيەۋى قايتىس بولعان. قازىر بالالارىن ءوزى تاربيەلەپ وتىر. بالالارىنىڭ ۇشەۋى – وقۋشى, ەكەۋى ءالى مەكتەپكە بارماعان. ۇلكەن قىزى تۋبەركۋلەزگە قارسى ديسپانسەردىڭ ەسەبىندە تۇر. بىراق ەشكىمنىڭ الدىنا الاقان جايىپ بارماعان. قالتالى كاسىپكەرلەردەن كومەك سۇراماعان. وسى كەزگە دەيىن كوپبالالى وتباسى باسپانا جالداپ كەلگەن.
– جىلىوي اۋدانىنان «قارا التىن» وندىرەتىن «جىلىويمۇنايگاز» باسقارماسىنىڭ مۇنايشىلارى كوپبالالى وتباسىنا كومەك كورسەتۋ ءۇشىن ەرىكتى تۇردە قاراجات جيناۋ باستاماسىن كوتەردى. جينالعان قاراجاتقا قۇلسارى قالاسىنان ەكى بولمەلى پاتەر ساتىپ الىندى. وتكەن جىلى مۇنايشىلاردىڭ وسىنداي دەمەۋشىلىگىمەن دوسسور كەنتىنەن ءۇش ءۇي, قۇلسارى قالاسىنان ءبىر پاتەر ساتىپ الىنعان ەدى. مۇنداي يگىلىكتى ءىس بيىل دا جالعاسىن تاۋىپ وتىر, – دەيدى «ەمبىمۇنايگاز» اق باسقارما توراعاسىنىڭ ورىنباسارى رىستى تاسماعامبەتوۆا.
مۇنايشىلار كوپبالالى وتباسىعا سىيعا بەرىلگەن پاتەر ورنالاسقان ءۇيدىڭ دالىزىنە جوندەۋ جۇرگىزدى. ال قونىس توي يەسىنە كىلەم تارتۋ ەتتى.