شىمكەنتتە ءجاسوسپىرىم سۋعا باتىپ كەتتى

وبلىستىق تجد ءباسپاسوز قىزمەتىنىڭ مالىمەتىنشە, قايعىلى جاعداي 2 مامىر كۇنى ساعات 14:45 شاماسىندا بولعان.

«قايتپاس-1» شاعىناۋدانىندا 15 جاستاعى بالا سۋعا شومىلۋعا جابدىقتالماعان شۇڭقىرعا تۇسكەن. اتاپ ايتقاندا, قاراۋسىز قالعان كارەرلىك قازانشۇڭقىردا جەراستى سۋلارى كوتەرىلگەن تۇستارى پايدا بولعان. ارتىنشا بالا بەلگىسىز جاعدايدا سۋعا قۇلاپ, باتىپ كەتكەن», دەدى شىمكەنت قالاسى تجد ءباسپاسوز حاتشىسى زاريپا ابدۋللاقىزى.

وقيعا ورنىنا شىمكەنت قالاسى تجد 5 قىزمەتكەرى, جەدەل-قۇتقارۋ جاساعىنىڭ 4 قۇتقارۋشى-سۇڭگۋىرلەرى, 1 تەحنيكا, 1 ءجۇزۋ قۇرالى تارتىلعان.

«جەدەل-قۇتقارۋ جاساعىنىڭ قۇتقارۋشى-سۇڭگۋىرلەرى وقيعا ورنىنا كەلىپ, سۋ استىندا ىزدەستىرۋ جۇمىستارىن جۇرگىزدى. ناتيجەسىندە كۇندىزگى ساعات 16:20 كەزىندە سۋعا باتىپ كەتكەن ءجاسوسپىرىمنىڭ ءمايىتىن تاپتى. بۇگىنگى تاڭدا قايعىلى وقيعانىڭ سەبەبى ناقتىلانىپ جاتىر», دەدى تجد وكىلى.

قازىرگى ۋاقىتتا قاراتاۋ اۋدانىنىڭ پوليتسياسى سوت-مەديتسينالىق ساراپتاما تاعايىنداپ, انىقتاۋ جۇمىستارىن جۇرگىزىپ جاتىر.

«قاراۋسىز قالعان وسى قازانشۇڭقىردا 1,5-2 مەتر تەرەڭدىكتە سۋعا باتىپ كەتۋ قاۋپى ءزورى. ول جەردە سۋعا تۇسۋگە بولمايدى دەگەن بەلگىلەر ورناتىلعان. ءبىز قانشا تىيىم سالعانىمىزبەن, بالالار ءجيى سۋعا بارادى. قازىر اكىمدىكپەن وسى كارەردى قورشاۋ ماسەلەسىن پىسىقتاپ جاتىرمىز. جەرگىلىكتى اتقارۋشى ورگاندار ول جەردىڭ جاۋىپ تاستايدى دەپ ءۇمىت ارتامىز», دەدى زاريپا ابدۋللاقىزى.