قازاقستان رەسپۋبليكاسى جانە رەسەي فەدەراتسياسى ىشكى ىستەر مينيسترلىكتەرىنىڭ ەسىرتكى قىلمىسىنا قارسى ءىس-قيمىل جونىندەگى بولىنىستەرى ەكى ەلدىڭ اۋماعىندا ەسىرتكىگە قارسى ارنايى وپەراتسيا جۇرگىزدى, دەپ حابارلايدى Egemen.kz Polisia.kz-كە سىلتەمە جاساپ.
ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ مىندەتىن اتقارۋشى اسقار مۇحامەتقاليەۆتىڭ ايتۋىنشا, فيگۋرانتتارعا جەدەل ازىرلەمە جاساۋ ءۇشىن ءىىم ورتالىق اپپاراتىنىڭ, پوليتسيا دەپارتامەنتتەرى مەن جامبىل وبلىسى بويىنشا ۇقك-ءنىڭ تاجىريبەلى قىزمەتكەرلەرى اراسىنان ارنايى توپ قۇرىلدى.
ومبى جانە تاراز قالالارىندا ءبىر مەزگىلدە جۇرگىزىلگەن ءىس-شارالار ناتيجەسىندە پوليتسەيلەر رەسەي فەدەراتسياسىنداعى سينتەتيكالىق ەسىرتكىلەردىڭ نەگىزگى جونەلتۋشىسىن جانە قازاقستاندا ونى قابىلداپ الۋشىنى ۇستادى. فيگۋرانتتاردىڭ تۇرعىلىقتى جەرلەرى بويىنشا ءتىنتۋ بارىسىندا ءىرى ەسىرتكى زەرتحانالارى انىقتالدى. ۇستالعان ومبى قالاسىنىڭ تۇرعىنى «سينتەتيكانى» دايىنداپ, پوشتا جونەلتىلىمدەرى ارقىلى ورتالىق ازيا ەلدەرىنە, ونىڭ ىشىندە قازاقستانعا جىبەرىپ وتىرعان. وسى رەتتە ول جاساندى قۇجاتتاردى پايدالانىپ, سالەمدەمەلەردى ءتۇرلى تاۋارلار – ماشينا مايى, تۇرمىستىق حيميا جانە ت.ب. تۇرىندە جاسىرىپ وتىرعان.
پوليتسەيلەر جالپى سوماسى 9,5 ملن استام اقش دوللارىنا باعالاناتىن 260 كگ ەسىرتكىنى تاركىلەدى.