قوستانايدا قازاقستان حالقىنىڭ بىرلىگى كۇنىنە وراي ۇيىمداستىرىلعان مەرەكەلىك ءىس-شارالار اياسىندا ۇلتتىق قولونەر بۇيىمدارىنىڭ كورمەسى ءوتتى. ەتنوكورمەدە توبىل وڭىرىندە تاتۋ-ءتاتتى تۇرىپ جاتقان ءتۇرلى ۇلت وكىلدەرىنىڭ ءتول مادەنيەتى مەن تۇرمىس-سالتىنان كورىنىس بەرەتىن مۋزىكا اسپاپتارى, توقىما بۇيىمدارى, ساندىك اشەكەيلەر مەن قاراپايىم تۇرمىسقا قاجەت ۇساق-تۇيەك زاتتار سورەگە قويىلدى.
كورمەدەگى زاتتاردىڭ ارقايسىسى ءار الۋان ۇلتتىڭ تۇرمىسى مەن مادەني تانىم-تابيعاتىنا ساي ەرەكشە ويۋىمەن كوز تارتىپ وزگەشەلەنگەنىمەن, ءبارىن بۇتىندەي العاندا قازاقستاندا تۇرىپ جاتقان كوپ ۇلتتىڭ بۇگىنگى بەيبىت تىنىس-تىرشىلىگى مەن ىرىس-ىنتىماعى جاراسقان جارقىن كەلبەتىن ايعاقتاپ تۇرعانداي.
ەتنوكورمەنى تاماشالاۋعا كەلگەن جۇرتتىڭ ءبىرازى وزدەرى قالاعان قولونەر بۇيىمدارىن ساتىپ الىپ, وعان اۆتوردىڭ قولتاڭباسىن قويدىردى. ۇزىن ءبىر قاتار بولىپ تىزىلگەن كورمە سورەلەرىنىڭ بىرىنەن وڭىرگە بەلگىلى اعاش شەبەرلەرى قابدىل-ءماجيت يمانوۆ پەن تاڭاتقان بوجاقوۆتاردىڭ تۋىندىلارى ورىن الىپتى. ءى.وماروۆ اتىنداعى قازاق دراما تەاترىنىڭ بەلدى ءارتىسى ءارى جارتى عاسىرعا جۋىق ۋاقىتتان بەرى دومبىرا جاساپ, بۇل ونەرىن تۇراقتى كاسىپكە اينالدىرعان قابدىل-ءماجيت اعا كەيىنگى جىلدارى ۇلتتىق اسپاپقا دەگەن سۇرانىس كوبەيىپ كەلە جاتقانىن ايتتى. جۇرت تاڭاتقان اعا جاساعان اعاش ىدىستاردى دا باعاسىنا كەلىسىپ اكەتىپ جاتتى.
– كوكتەرەك سەكىلدى ساپالى اعاشتان جونىلعان ىدىستا تۇرعان اس ءدامىن جوعالتپايدى ءارى كوپكە دەيىن بۇزىلماي ساقتالادى, – دەيدى ۇستا.
ال نيكولاي بەردنيكوۆ اعاشتان جاسالعان كۇنتىزبە, مايلىق سالعىش, ءتۇرلى مۇسىنشەلەرىن ساۋداعا شىعارىپتى. وعان قاراما-قارسى ورنالاسقان يرينا شۋرۋپوۆا توقىما قۋىرشاق جاساۋمەن اينالدىسادى. جۇمساق قۋىرشاقتاردىڭ باعاسى 2 جارىم مىڭ تەڭگەدەن باستالىپ, 17 مىڭ تەڭگەگە دەيىن جەتەدى ەكەن.
– كوز مايىن تاۋسىپ ءبىر قۋىرشاقتى توقىپ شىعۋ ءۇشىن ءبىرتالاي ۋاقىت كەتەدى. اسقان تاباندىلىقتى قاجەت ەتەتىن وتە كۇردەلى جۇمىس. كۇردەلى بولاتىن سەبەبى قۋىرشاقتىڭ كولەمىنە ەمەس, توقۋ ادىسىنە, ءتۇرلى بولشەكتەرىنە بايلانىستى, – دەيدى ىسمەر.