ءبىز بەيبىت اسپان استىندا ءومىر ءسۇرىپ جاتقانىمىزعا مىڭ دا ءبىر العىس ايتۋىمىز كەرەك. زامانىمىز تىنىش, بەرەكە-بىرلىگىمىز جاراسقان. ءوزىم شىعىس قازاقستان وبلىسىنداعى ورىس مادەني ورتالىعىنىڭ بەلسەندىسىمىن.
رەسەيدىڭ بارناۋل قالاسىندا ونەر اكادەمياسىندا وقىعانمىن. سودان بەرى شىعارماشىلىقپەن اينالىسىپ كەلەمىن. ءان سالىپ قانا قويمايمىن, ورىستىڭ ءان ونەرىن دە زەرتتەيمىن. كوللەدج قابىرعاسىندا جۇرگەندە-اق «باستەنكي» فولكلور انسامبلىندە ونەر كورسەتتىم. كەيىن «رودنيچوك» بالالار انسامبلىندە جەتەكشى بولدىم. كىشكەنتاي بالدىرعاندارىم رەسپۋبليكالىق, حالىقارالىق بايقاۋلاردا توپ جاردى.
ءالى دە ءان ونەرىنەن قول ۇزبەيمىز. ايتايىن دەگەنىم, كوڭىلىمىز توق, ۋايىمىمىز جوق بولىپ, اندەتىپ, بي بيلەپ جۇرە بەرگەنىمىزگە نە جەتسىن؟! كوپۇلتتى ەلىمىز ءبىر شاڭىراق استىندا تاتۋ-ءتاتتى عۇمىر كەشىپ جاتىرمىز. ءار ۇلتتىڭ ونەرىن, سالت-ءداستۇرىن, ءتىلىن, ءدىلىن سىيلايمىز.
العاش قازاقستاندا دوستىق ءۇيى بىزدە, وسكەمەندە اشىلعانى ەسىمىزدە. سوندا سالتاناتتى ءىس-شاراعا دا ءوزىمىز دە قاتىستىق. سول كەزدە-اق ەلىمىزدىڭ بىرلىگى, بىرتۇتاستىعى سەزىلگەن ەدى. ءار بىرلەستىك مۇشەلەرىمەن تۋىسقانداي بولىپ ارالاسىپ كەتتىك. قانشاما ءىس-شارا وتكىزدىك؟! قازىرگى تاڭدا دوستىق ءۇيى كەڭەيىپ, قاناتىن كەڭگە سەرمەدى. قوعامدىق جۇمىستارعا جاستار دا تارتىلىپ جاتىر. وسىنىڭ ءبارى ءبىزدى قۋانتادى. ۇلتتاردىڭ ايرانداي ۇيىپ وتىرعاندارىنا قاراپ قۋانامىز. وسىناۋ بىرلىگىمىزدەن, تاتۋلىعىمىزدان ايىرىلمايىق. كەشەگى ەلىمىزدى ەسەڭگىرەتىپ كەتكەن كەسەلدەن ساقتاسىن! ءتۇرلى قاقتىعىستاردان اۋلاق بولايىق! ەلىمىز ماڭگى جاساسىن!
اننا ديومينا,
ورىس مادەني بىرلەستىگىنىڭ بەلسەندىسى