بىرنەشە جىلدان بەرى ينتەرنەت كەڭىستىكتە بولىپ جاتقان اقپاراتتىق سوعىستى نازاردان تىس قالدىرۋ مۇمكىن ەمەس. بۇگىنگى تاڭدا الەۋمەتتىك جەلىلەردە ابايسىزدا ايتىلعان ءسوز ەلەۋلى قاقتىعىستارعا اكەلۋى ىقتيمال, ءتىپتى ەلدەگى جاعدايدى تۇراقسىزداندىرۋى مۇمكىن. ادامدار وزىمىزدىكى جانە بوتەن دەپ بولىسە باستايدى. الەۋمەتتىك مەديادا ارانداتۋشىلار كوپ. فەيك-نيۋس دەگەن دە بار. ونى قۇرتۋ كەرەك ەدى.
جاڭارعان قازاقستان – جاڭا اقپاراتتىق ساياسات, ول ءبىر ۋاقىتتا ءسوز بوستاندىعىنا قۇقىق بەرىپ, ءاربىر جاريا ءسوز ءۇشىن جاۋاپ بەرۋگە مىندەتتەۋگە ءتيىس. ايتپەسە, جىلدار بويى جيناعان بارلىق قۇندىلىعىمىزدان ايىرىلىپ, «اقپاراتتىق حاوستا» قالىپ قويۋىمىز مۇمكىن. ءبىز بۇقارالىق اقپارات قۇرالدارىنىڭ, اسىرەسە سىني جاعدايلاردا, قانداي كۇشكە يە ەكەنىن بىلەمىز. قاڭتار وقيعالارى كەزىندە ءبىز مۇنى تولىق سەزدىك. ءالى كۇنگە دەيىن ءتۇرلى اقپارات تاراتىلىپ جاتىر. مەنىڭ ويىمشا, ولاردى قاداعالاپ, جازالاۋ كەرەك! ارىپتەس جۋرناليستەرگە ايتارىم, ءبىز سىزدەرمەن بىرگە ەل تاريحىن جازىپ جاتىرمىز. جاي تانىمالدىلىقپەن حايپ قۋىپ, قوعامدى الداماۋىمىز كەرەك. اقىر سوڭىندا, قاراپايىم جۋرناليستىك ەتيكا, ار-نامىس كودەكسىنىڭ بارىن ەستەن شىعارماۋىمىز كەرەك. بۇگىندە گەوساياسي داعدارىس جاعدايىندا بۇل جاۋاپكەرشىلىك ەسەلەپ ارتۋدا. ءبىز تاراپتاردىڭ ەشقايسىسىن قولدامايمىز جانە كەز كەلگەن زورلىق-زومبىلىققا قارسىمىز. ءبىز ءۇشىن ءوز ەلىمىزدە بەيبىتشىلىك پەن بىرلىكتى ساقتاۋ الدەقايدا ماڭىزدىراق. زەيىنىمىزدى ءوز مۇددەلەرىمىزگە شوعىرلاندىرامىز. بۇل تاقىرىپتى بىلە تۇرا ءورشىتىپ وتىرعاندار وتە راديكالدى مالىمدەمەلەرگە جول بەرەدى, ولاردى قاتاڭ تۇردە توقتاتۋ كەرەك. مۇنى كىم ايتقانى ماڭىزدى ەمەس: جۋرناليست پە, قوعام قايراتكەرى مە, ساياساتكەر مە, الدە قاراپايىم ازامات پا؟ ەتنوستىق تەگىنە دە قاراماستان. مەملەكەت بۇل تۇرعىدا ناقتى ارەكەت ەتۋگە ءتيىس.
پرەزيدەنتتىڭ نۇسقاۋلارىنا سايكەس اسسامبلەيا مۇشەلەرى مەن قوعامدىق قۇرىلىمدارى ءۇنسىز قالمايدى جانە ەلىمىزدەگى بىرلىك پەن بەيبىتشىلىككە قارسى ايتىلعان بىردە-ءبىر ءسوزدى جاۋاپسىز قالدىرمايدى. ماسەلەن, رەسەي-ۋكراينا قاقتىعىسىنا بايلانىستى قازاقستاندىقتار اراسىندا ارانداتۋشىلىق پەن الاۋىزدىق تۋدىرۋ ارەكەتتەرىنە قاتىستى بىرقاتار رەسپۋبليكالىق ەتنومادەني بىرلەستىكتىڭ كوشباسشىلارى ءتيىستى بىرلەسكەن مالىمدەمە جاسادى.
ورىس ەتنوسىنىڭ وكىلى رەتىندە وسى مۇمكىندىكتى پايدالانا وتىرىپ, ەلىمىزدىڭ ورىس ازاماتتارىنا ايتارىم, ءبىزدىڭ ارقايسىمىز ءوز وتانىمىز قايدا ەكەنىن ناقتى ءتۇسىنۋىمىز كەرەك. مەن ءۇشىن قازاقستان – تۋعان ەل. مەن وسىندا تۋدىم, اكەم مەن اجەم دۇنيەگە كەلدى, ماعان ەشكىم ەشقاشان ۇلتىما قاراپ قىسىم كورسەتكەن جوق. مەنىڭ ءوز تىلىمدە سويلەۋگە, تابىستى جۇمىس ىستەۋگە مۇمكىندىگىم بار. بالالارىم ورىس مەكتەبىندە وقيدى. سوندىقتان بۇعان ريزاشىلىقپەن قاراۋىمىز كەرەك. ءبارىمىز بىرگە بولۋىمىز كەرەك. قازاقستان ىشىندەگى بەيبىتشىلىكتى ساقتايىق. بۇل – كەز كەلگەن شابۋىلعا قارسى تۇرۋ.
نادەجدا پالينكا,
جۋرناليست