30 ءساۋىر كۇنى ەلوردالىق ءال-فارابي اتىنداعى وقۋشىلار سارايىندا 7-8 سىنىپ وقۋشىلارى اراسىندا حيميا جانە بيولوگيا پاندەرى بويىنشا ءى وڭىرلىك وليمپيادانىڭ جەڭىمپازدارى مەن جۇلدەگەرلەرىن ماراپاتتاۋ ءراسىمى وتەدى. زياتكەرلىك سايىستار نۇر-سۇلتان قالاسىنىڭ ءبىلىم باسقارماسى مەن «دارىن» رعپو قولداۋىمەن قازاقستانداعى بالالار جىلىن مەرەكەلەۋ اياسىندا «استانا دارىنى» كقكو ۇيىمداستىرىلدى, دەپ حابارلايدى Egemen.kz نۇر-سۇلتان اكىمدىگىنىڭ رەسمي سايتىنا سىلتەمە جاساپ.
حيميا جانە بيولوگيا پاندەرىنەن ءبىرىنشى وڭىرلىك وليمپيادا زياتكەرلىك دارىندى بالالاردى ەرتە انىقتاۋ, ءبىلىم الۋشىلاردىڭ پاندەرگە تانىمدىق قىزىعۋشىلىعىن قالىپتاستىرۋ ماقساتىندا وتكىزىلەدى.
وليمپيادا 28 جانە 29 ساۋىردە نۇر-سۇلتان قالاسىندا 2 تۋردا (تەوريالىق جانە پراكتيكالىق) وتكىزىلدى. وعان اتىراۋ, ماڭعىستاۋ, پاۆلودار, قاراعاندى, شقو, اقمولا وبلىسى, قوستاناي جانە نۇر-سۇلتان قالالارىنان كوماندالار قاتىستى.
149 جاس زياتكەر ءوزىنىڭ بارلىق ءبىلىمى مەن ىسكەرلىگىن كورسەتە وتىرىپ, حيميا مەن بيولوگيادان كۇردەلى وليمپيادالىق ەسەپتەردى شەشۋدە جارىستى. حيميا ءپانى بويىنشا 84 وقۋشى قاتىستى, ونىڭ ىشىندە: 7 سىنىپ - 32 وقۋشى, 8 سىنىپ-52 وقۋشى. بيولوگيا ءپانى بويىنشا -66 قاتىسۋشى: 7 سىنىپتار -40 وقۋشى, 8 سىنىپتار – 26.
زياتكەرلىك جارىستارعا قاتىسۋ وقۋشىلارعا ولاردىڭ جەكە ءوسۋى مەن دامۋىنا, ومىردە جەتىستىككە جەتۋ ءۇشىن قاجەتتى جاڭا ءبىلىم الۋعا, تاۋەلسىز ويلاۋدى يگەرۋگە جانە ولاردىڭ قابىلەتتەرى مەن مۇددەلەرىن انىقتاۋعا كوپتەگەن مۇمكىندىكتەر بەرەدى.
وليمپيادانىڭ دەمەۋشىسى قايىرىمدىلىق قىزمەتىمەن تانىمال, الەمدەگى ەڭ ءىرى مۇناي كومپانياسى - «ەكسون موبيل» كومپانياسى بولدى. ماراپاتتاۋ راسىمىندە وليمپيادانىڭ جەڭىمپازدارى مەن جۇلدەگەرلەرىنە «دارىن» رعپو I, II,III دارەجەلى ديپلومدارى جانە دەمەۋشىنىڭ سىيلىقتارى تابىس ەتىلەدى.