پەتروپاۆلدا ماس جۇرگىزۋشى جاياۋ ادامدى قاعىپ كەتتى

پەتروپاۆلدا ءۋاليحانوۆ كوشەسىندەگى جول قوزعالىسى رەتتەلمەيتىن جاياۋ جۇرگىنشىلەر وتكەلىندە Toyota RAV-4 اۆتوكولىگىنىڭ جۇرگىزۋشىسى 49 جاستاعى قالا تۇرعىنىن قاعىپ كەتكەن. بۇدان كەيىن جۇرگىزۋشى ءبىر باعىتتا كەتىپ بارا جاتقان Volkswagen اۆتوكولىگىمەن سوقتىعىسقان.

جول-كولىك وقيعاسى سالدارىنان ايەل مەديتسينالىق مەكەمەسىنە جەدەل جاردەم كولىگىمەن جەتكىزىلدى. Toyota تىزگىنىندە 54 جاستاعى تۇرعىن بولعان. مەديتسينالىق كۋالاندىرۋ ونىڭ ماساڭ كۇيدە بولعانىن كورسەتتى.

اتالعان فاكت قر قىلمىستىق كودەكسىنىڭ 345-1 بابى (الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدە كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى. ساراپتامالار تاعايىندالدى. اۆتوكولىك ارنايى تۇراققا قويىلدى.

«جالپى 3 ايدىڭ ىشىندە وبلىس اۋماعىندا ماس جۇرگىزۋشىلەرمەن 4 جول-كولىك وقيعاسى جاسالدى. سونىڭ سالدارىنان 3 ادام قازا تاۋىپ, 2-ءۋى جاراقات العان. اۆتوكولىكتەن كەلەتىن قاۋىپ جوعارى, ونى ماساڭ كۇيدە باسقارۋعا جول بەرىلمەۋى ءتيىس. پوليتسەيلەر وسىنداي فاكتىلەردى انىقتاۋ جانە جولىن كەسۋ بويىنشا ماقساتتى جۇمىس جۇرگىزەدى. جىل باسىنان وبلىس بويىنشا 263 ماس جۇرگىزۋشى اكىمشىلىك جاۋاپكەرشىلىككە تارتىلدى», دەيدى سقو پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى ايدىن بايماتوۆ.