مەيىرىم دەگەن نە وسى؟ سەزىم بە, قاسيەت پە, الدە ەموتسيا ما؟ مۇمكىن كوڭىل كۇيدىڭ اسەرىنەن تۋىندايتىن مىنەز شىعار؟ سول مەيىرىم ادامدا تاۋسىلا ما ەكەن؟ بالكي, جۇرەك قاتايىپ, ىستىق سەزىمدەر وشكەن كەزدە مەيىرىم دە مۇزعا اينالار. ەگەر ول تەك سانالى جانعا ءتان قاسيەت بولسا, وندا نەگە الەمدە سوعىس بولىپ جاتىر؟ نەگە ادامدار ءبىر-بىرىنە ادىلەتسىز؟ وسى جولداردى جازىپ وتىرىپ, مەيىرىم دەگەن ءسوزدى گۋگلدان ىزدەپ كورىپ ەدىك. سىعاناق 19 كوشەسىندەگى «مەيىرىم» مەديتسينالىق ورتالىعى اتىپ شىقتى. ال ءبىز ىزگى مىنەز تۋرالى ءسوز قوزعاپ وتىرمىز...
جۇمىر جەردىڭ بەتىندە تىرشىلىك باستالعان ۋاقىتتان بەرى ايتىلىپ كەلە جاتقان جالعىز سۇراق بار: الەمدى نە ۇستاپ تۇر؟ بۇل ءتىپتى ادامزاتتىق ساۋالعا ۇلاسىپ, ءتۇرلى عىلىم سالاسىندا ءھام ادەبيەتتە دە, ونەردە دە, كينودا دا ماڭگىلىك تاقىرىپقا اينالدى. وعان اركىم ءارتۇرلى جاۋاپ بەرەر: بىرەۋ الەمدى قارا جەر ۇستاپ تۇر دەسە, بىرەۋ قۇداي, بىرەۋ ادام دەر. بالكي, اقشا, بالكي, اۋا. پۋتين دەپ تە ايتاتىندار تابىلار (تاڭعالماڭىز). كەي ادام دۇنيەنىڭ كىلتى ىزگىلىكتە دەيدى: جاقسىلىق پەن جىلۋلىق, مەيىرىم مەن سەزىم. ال ماحاببات شە؟ ەندى بىرەۋ الەمنىڭ ۇستىنى ادامداردىڭ بىرلىگى دەر. ءيا, ۋكرايناداعى ەكى ايدان استام ۋاقىتتان بەرى بولىپ جاتقان قاقتىعىستار جۇرەك اۋىرتار اسەرىنەن بولەك بارشا الەمگە ءبىر ۇعىمدى ۇعىندىرعان سياقتى. بىرلىك.
بىرلىك دەگەن دە ۇلتتىق مىنەزگە جاتاتىن ءھام قانمەن سىڭەتىن قاسيەت بولسا كەرەك. بايقاساڭىز, ۇلتشىل, پاتريوتتىق رۋحى بيىك حالىقتاردىڭ بىرلىگى مىعىم بولادى. ماسەلەن, ىرگەمىزدەگى وزبەكستان. ۋكراينداردى دا ءدال قازىر ۇرەي مەن قورقىنىشتان الشاق ۇستاپ تۇرعان وسى – بىرلىك. ياعني بىرلىك – تەك بەس-التى ادامنىڭ بىرىگىپ جۇمىس ىستەۋى ەمەس, كەيدە تۇتاس ءبىر ۇلتتىڭ, مەملەكەتتىڭ تاعدىرىن شەشەتىن ساتتە دە كۇش بەرەتىن قاسيەت. تاريحقا كوز سالساڭىز, ۇلتتىڭ ۇيىعان بىرلىگىمەن امان قالعان, ياكي ازات بولعان ەلدەر كوپ. سوندا بىرلىك ورتاق كەلىسىم, اۋىزبىرشىلىك سىندى ۇعىمداردان بۇرىن ۇلتتىق مىنەزدەن تۋادى. ياعني ناعىز بىرلىك ادامعا تەك قانمەن كەلەدى.
ەگەر وسى ۇعىمدار الەمدى ۇستاپ تۇرعان بولسا, ادامدى ادام قىلىپ تۇرعان نە دەگەن ويعا دا قالاسىڭ. ارينە, ادامدىق قاسيەتتەر, اق ادال كوڭىل, كەڭ پەيىل, ىستىق جۇرەك, سۋىق اقىل دەپ ءبارىمىز ايتامىز عوي. الايدا كەيدە قوعامداعى سۇمدىق جاعدايلار وسى ىزگى مىنەزدەردى ءبىر ساتتە جوق قىلادى. ءبىر جاعىنان ادامدار تەك جاقسى, مەيىرىمدى بولۋى كەرەك دەگەن زاڭ جازىلماعان. سوندىقتان دا اۋرۋحاناداعى كەزەك ءۇشىن توبەلەسەتىن, ون مينۋت كۇتىپ قالسا, شاپىراشتانا جونەلىپ, تار ءومىردى ودان سايىن تارىلتاتىن ادامداردى سوتتاي المايسىڭ. ءتىپتى سالەمىڭە اۋزىن جىبىرلاتىپ, سامارقاۋ امانداساتىن ارىپتەسىڭە دە ەشتەڭە دەي المايسىڭ. اينالاڭداعى بارلىق كەلەڭسىزدىك, سوعىس, اپات, قايعى, ادىلەتسىزدىك ادامداردىڭ قاتقان جۇرەگىنەن جاسالىپ جاتسا دا ەشكىمگە سوت جوق. بۇل قوعامدا ادامدار تەك قىلمىستىق كودەكستە جازىلعان قىلمىسى ءۇشىن عانا سوتتالادى. مەيىرىمسىزدىگى ءۇشىن ەمەس.