عىلىمدى دامىتۋعا جاسالاتىن جاعداي

ەۋرازيالىق ەكونومي­­­كا­لىق وداققا قاتىسۋشى ەلدەر – قازاقستان, بەلورۋسسيا, رەسەيدىڭ اۋماقتىق كولەمى الەمنىڭ 15 پايىزىن قامتىپ, جەر شارىنداعى حالىقتىڭ 3 پايىزىن, الەمدىك اۋىزسۋ مەن پايدالى رەسۋرستاردىڭ 20 پايىزىن, مۇناي قورىنىڭ 7-8 پايىزىن, استىق ءوندىرۋدىڭ 5,9, تەمىردىڭ 5,1, ەلەكتر قۋاتىن ءوندىرۋدىڭ 5,5 پايىزىن قۇرايدى ەكەن. اتالمىش ەكونوميكالىق وداق الەمدىك ىشكى ءونىمنىڭ 4,5 پايىزىنا يە. ارينە, بۇل كورسەتكىشتەر ازيا-تىنىق مۇحيت ەكونوميكالىق ارىپتەستىگىمەن سالىس­تىرعاندا كوپ ەمەس. الايدا, ادامزاتتىڭ دامۋى تەك ءبىلىم مەن عىلىمى دامىپ, بەيبىت احۋالى تۇراقتانعان ورتادا عانا تولاسسىز جەمىس بەرەتىنىن ەسكەرگەن ءجون. قازىرگى تاڭدا كەدەن وداعىنا مۇشە ەلدەر ايماعىندا 1600-دەن اسا جوعارى وقۋ ورىندارى قالىپتاسىپ وتىر. ولار قازاقستاندا – 139, بەلورۋسسيادا – 55, رەسەيدە 1400 وقۋ ورداسى. بۇل مىسال الداعى كەزەڭدە ءوزارا ءبىلىم-عىلىم ينتەگراتسياسى دامۋ ساتىسىنا اياق باسقان تۇستا قاتىسۋشى ەلدەردىڭ ەكونوميكالىق بيىكتەردى باعىندىرۋىنا زور ۇلەس قوساتىن ساۋاتتى ماماندار لەگى كەلە جاتقانىن كورسەتسە كەرەك. ءبىلىم-عىلىم ينتەگراتسياسى جاعدايىندا وزگەلەرمەن تەرەزەمىز تەڭ بولۋ ءۇشىن ءبىز عىلىمي ىزدەنىستەر مەن زەرتتەۋلەرگە قارجىنى جەتكىلىكتى دارەجەدە ءبولۋىمىز قاجەت. بۇل رەتتە قازاقستاننىڭ اياق الىسى ايتارلىقتاي. ماسەلەن, عىلىمي تاجىريبەلەر مەن ىزدە­نىس­تەرگە ورتا ەسەپپەن ىشكى جال­پى ءونىمنىڭ ورتاق قازا­نى­نان 20 اقش دوللارىن جۇم­ساپ وتىرساق, رەسەيدە بۇل كور­سەتكىش 100 اقش دوللارى, ال امەريكادا 999 اقش دوللارى. ەۋروازيالىق ەكونوميكالىق وداق بازاسىن ءتيىمدى پايدالانا وتىرىپ ءبىز جوعارى ءبىلىم بەرۋ جۇيەسىن جاڭا دەڭگەيگە كوتەرۋىمىز كەرەك. بارلىق قاجەتتى ماماندىقتارعا تارتىلاتىن جاس مامانداردىڭ ورتاق جۇيەسىن جانە زياتكەرلىك تالابىن كوتەرۋدىڭ دە ورتاق جۇيەسىن قالىپتاستىرۋعا قول جەتكىزگەن ءجون. جۋىردا ەلباسى نۇرسۇلتان نازارباەۆ ەلىمىزدىڭ ءبىلىم جانە عىلىم مينيسترىنە بىرقاتار جاڭا تاپسىرمالار مەن جوعارى وقۋ ورىندارىنىڭ ساپاسىنا قاتىستى ناقتى ۇستانىمداردى ايقىنداۋ تۋرالى تاپسىرما جۇكتەدى. ياعني كەلەشەكتە ءبىلىم مەن عىلىم سالاسىنا باسا نازار اۋدارا وتىرىپ, ءبىز وتاندىق ءبىلىم بەرۋ جۇيەسىن نىعايتۋمەن قاتار, جاس مامانداردى دايارلاۋ, ولاردىڭ حالىقارالىق دارەجەدەگى ءبىلىم دەڭگەيىن ءوسىرۋ, ەكونوميكالىق ينتەگراتسيا جاعدايىنداعى سۇرانىسىنىڭ ارتۋىن دا رەتتەستىرۋگە قول جەتكىزەمىز. سەرىك سۆياتوۆ, ت.رىسقۇلوۆ اتىنداعى قازاق ەكونوميكالىق ۋنيۆەرسيتەتىنىڭ رەكتورى. الماتى.