ماڭعىستاۋداعى يتبالىقتاردىڭ قىرىلۋ سەبەبى انىقتالىپ جاتىر

«2022 جىلى 26 ساۋىردە الەۋمەتتىك جەلىلەردەگى اقپاراتقا مونيتورينگ جۇرگىزۋ بارىسىندا كاسپي تەڭىزىنىڭ جاعالاۋىندا «قاراجانباس» كەن ورنىنىڭ سۋ بوگەتى ماڭىندا ءولى يتبالىقتاردىڭ 50-گە جۋىق ۇشاسى تابىلعانى تۋرالى اقپارات انىقتالدى.

وقيعا ورنىنا جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ ماڭعىستاۋ وبلىسى بويىنشا بالىق ينسپەكتسياسى باسقارماسىنىڭ مەملەكەتتىك ينسپەكتورلارى جەدەل جولداندى», دەلىنگەن حابارلامادا.

جاۋاپتى مەملەكەتتىك ورگاندار اراسىندا 2021-2022 جىلدارعا ارنالعان ءوزارا ءىس-قيمىل جوسپارىنا سايكەس, سۋ جانۋارلارىنىڭ جاپپاي قىرىلۋ جانە قاۋىپ-قاتەرىن انىقتاۋ ءۇشىن جۇمىس توبى قۇرىلۋدا. وسى ماقساتتا وبلىستىق قۇقىق قورعاۋ, تابيعات قورعاۋ ورگاندارىنا, پروكۋراتۋرا, ۆەتەريناريا, جەرگىلىكتى اتقارۋشى ورگانعا, ەكولوگيا جانە توتەنشە جاعدايلار دەپارتامەنتىنە جەدەل حابارلاندى.

«2022 جىلى 26 ءساۋىر ساعات 23:00-گە دەيىن كەلىپ تۇسكەن اقپاراتقا سايكەس, تەڭىز جاعالاۋىنىڭ ءاربىر جەرىندە جاتقان 22 ءولى يتبالىق تابىلدى. يتبالىقتاردىڭ ءولۋ سەبەپتەرىن انىقتاۋ ءۇشىن جانۋارلاردىڭ ۇشالارىن زەرتحانالىق تەكسەرۋگە الۋ مۇمكىندىگىن ينسپەكتسيا قىزمەتكەرلەرىمەن قاراستىرىلۋدا, ويتكەنى ولاردىڭ دەنەلەرى ىدىراۋ كۇيىندە. قازىرگى ۋاقىتتا ماڭعىستاۋ وبلىستىق بالىق ينسپەكتسياسى باسقارماسىنىڭ ينسپەكتورلارى بالىق شارۋاشىلىعى سۋبەكتىلەرىنىڭ قورىقشىلىق قىزمەتىمەن بىرلەسىپ, كاسپي تەڭىزىنىڭ جاعالاۋ ايماعى مەن باسقا دا ۋچاسكەلەرگە باقىلاۋ جاساۋدا. زەرتحانالىق زەرتتەۋلەر جۇرگىزۋ ءۇشىن بالىق قورعاۋ ينسپەكتورلارى بىرنەشە يتبالىقتى, تەڭىز سۋى مەن توپىراقتان سىناما الدى. ولار ەكولوگيا دەپارتامەنتى مەن ۆەتەرينارلىق قىزمەتىنە تاپسىرىلاتىن بولادى», دەپ حابارلاندى ۆەدومستۆودان.

2022 جىلعى 27 ساۋىردە اتالعان ورگاندار قىزمەتكەرلەرى وقيعا ورنىنا شىعۋدى جوسپارلاۋدا. سونىمەن قاتار, اتالعان فاكتى تۋرالى قر بعم عىلىم كوميتەتىنىڭ «ميكروبيولوگيا جانە ۆيرۋسولوگيا ينستيتۋتى» زەرتحاناسىنىڭ قىزمەتكەرلەرىنە, سونداي-اق «گيدروبيولوگيا جانە ەكولوگيا ينستيتۋتى» باتىس قازاقستان مەكەمەسىنىڭ قىزمەتكەرلەرىنە حابارلاندى. جاعالاۋدى باقىلاۋ جۇمىستارى جالعاسۋدا. جاڭارتىلعان اقپارات قوسىمشا جاريالانادى.