نۇر-سۇلتان قالاسىنىڭ بانك قىزمەتكەرى تۇتىنۋشىلاردىڭ اتىنان نەسيە راسىمدەپ, الاياقتىق جاساعان, دەپ حابارلايدى Egemen.kz polisia.kz سايتىنا سىلتەمە جاساپ.
28 قاڭتاردا قاراعاندى قالاسى پب-نىڭ وڭتۇستىك-شىعىس پوليتسيا بولىمىنە 50 جاستاعى قالا تۇرعىنىنان ارىز ءتۇسىرىپ, بەلگىسىز بىرەۋ ونىڭ اتىنان 2 ميلليون 100 مىڭ تەڭگە كولەمىندە نەسيە راسىمدەگەنىن ايتقان.
تەرگەۋ ناتيجەسىندە جابىرلەنۋشىنىڭ اتىنا راسىمدەلگەن نەسيە نۇر-سۇلتانداعى بانكتەردىڭ بىرىندە بەرىلگەن بولىپ شىقتى. پوليتسەيلەر بۇل قىلمىسقا ارىزدانۋشىنىڭ تانىستارىنىڭ قاتىسى بار دەگەن نۇسقامەن جۇمىس ىستەۋگە كىرىستى.
«20 ساۋىردە جەدەل-ىزدەستىرۋ ءىس-شارالارى بارىسىندا كريمينالدىق پوليتسيا قىزمەتكەرلەرى 19 جاستاعى ەلوردا تۇرعىنىن ۇستادى. ول ءوز كىناسىن مويىندادى. ۇستالعان ازاماتتىڭ جابىرلەنۋشىگە نەسيە بەرىلگەن قارجى مەكەمەسىنىڭ مەنەدجەرى ەكەنى بەلگىلى بولدى», دەلىنگەن حابارلامادا.
پوليتسيا قىزمەتكەرلەرى سوتقا دەيىنگى تەرگەۋ بارىسىندا كۇدىكتىنىڭ وسىعان ۇقساس تاعى 18 قىلمىسقا قاتىستىلىعىن انىقتادى. ونىڭ ۇستىنە زارداپ شەككەندەر رەسپۋبليكانىڭ ءار ءوڭىرىنىڭ تۇرعىندارى بولىپ شىقتى. جابىرلەنۋشىلەرگە كەلتىرىلگەن شىعىننىڭ جالپى سوماسى انىقتالىپ جاتىر.
اتالعان فاكتى بويىنشا قىلمىستىق كودەكستىڭ 190-بابى («الاياقتىق») بويىنشا قىلمىستىق ءىس قوزعالدى.
ايانا توعانبەك