ازاماتتىق باستامالاردى قولداۋ ورتالىعىندا «اۋىلدىق جەرلەردە ازاماتتىق باستامالاردى دامىتۋعا باعىتتالعان ءىس-شارالار كەشەنىن ۇيىمداستىرۋ» الەۋمەتتىك جوباسىنىڭ ونلاين پرەزەنتاتسياسى ءوتتى, دەپ حابارلايدى Egemen.kz.
جوبا اقپارات جانە قوعامدىق دامۋ مينيسترلىگىنىڭ قولداۋىمەن جۇزەگە اسىرىلىپ جاتىر.
جوسپارعا سايكەس اۋىلدىق باستامالار سالاسىنداعى زاماناۋي جوبالار ءومىر ءسۇرۋ ساپاسىن ارتتىرۋعا جانە جەرگىلىكتى قوعامداستىقتىڭ وزەكتى ماسەلەلەرىن شەشۋگە باعىتتالماق.
جوبانى ىسكە اسىرۋ بارىسىندا اۋىلدىق جەرلەردەگى باستاماشىل توپتاردىڭ قارجىلىق جانە زاڭدىق ساۋاتتىلىعىن ارتتىرۋ ماسەلەلەرىنە ەرەكشە كوڭىل بولىنەدى دەپ كۇتىلۋدە.
«بيىل ءبىزدىڭ جوبا اياسىندا اۋىلدىق جەرلەردەگى باستامالاردى دامىتۋعا 50 شاعىن گرانت بولىنەدى. ءاربىر گرانتتىڭ مولشەرى - 500 مىڭ تەڭگە. الايدا قازىرگى ۋاقىتتا اۋىل كوشباسشىلارىنىڭ ءوز باستامالارىن ىسكە اسىرۋىنا مۇمكىندىك بەرەتىن داعدىلارى, قۇزىرەتى دەڭگەيىنىڭ تومەندىگىنە قاتىستى بىرقاتار ماسەلە بار. سونداي-اق, ولاردىڭ جوبانى الەۋمەتتىك جوبالاۋدا, بيۋدجەتتىك ءوتىنىم جاساۋدا, جوبانى ساپالى ىسكە اسىرۋدا تاجىريبەسى جوق. سوندىقتان جوبانىڭ باسىنان باستاپ ءبىز الەۋەتتى گرانت الۋشىلار ءۇشىن وقىتۋ سەمينارلارىن, كەڭەس بەرۋ ءىس-شارالارىن ۇيىمداستىرامىز. شاعىن گرانتتاردى ىسكە اسىرۋ بارىسىندا, سونداي – اق, كونكۋرستى جاريالاۋ كەزىندە اۋىلدىق جەرلەردە 200-دەن استام تۇرعىنعا, ۇەۇ وكىلدەرىنە كەڭەس بەرەمىز دەپ بولجاپ وتىرمىز», دەپ اتاپ ءوتتى «جاستار ءسوس ءۇشىن» جقب توراعاسى ليديا گرابار.
ول سونداي-اق جەرگىلىكتى قوعامداستىقتاردىڭ وزەكتى ماسەلەلەرىن شەشۋگە باعىتتالعان جوبالاردى ىسكە اسىرۋ بارىسىندا مونيتورينگتىك ءىس-شارالاردىڭ جۇرگىزىلەتىنىن اتاپ ءوتتى.
جوبا اياسىندا اۋىلداردا كەمىندە 20 تۇراقتى جۇمىس ورنى ۇيىمداستىرىلادى دەپ جوسپارلانعان.
«اۋىلدىق جەرلەردە ازاماتتىق باستامالاردى دامىتۋعا باعىتتالعان ءىس-شارالار كەشەنىن ۇيىمداستىرۋ» جوباسىن ىسكە اسىرۋ 2022 جىلدىڭ سوڭىنا دەيىن جالعاسادى.