اقمولا وبلىسىندا يت تالاعان 8 جاستاعى قىز بالا ءتۇرلى دەنە جاراقاتىمەن اۋرۋحاناعا جۇگىندى, دەپ حابارلايدى Egemen.kz.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, وقيعا 21 ءساۋىر كۇنى زەرەندى اۋدانىنىڭ شاعالالى اۋىلىندا بولعان. پوليتسيا بولىمىنە 33 جاستاعى ايەل حابارلاسىپ, شىعىس ەۋروپالىق تۇقىمدى ءيتتىڭ يەسىنە شارا قولدانۋدى سۇراعان.
«ايەلدىڭ سوزىنشە, ساعات 19:30 شاماسىندا كورشىنىڭ ءيتى كوشەدە جۇرگەن 8 جاسار قىزىنا شابۋىلداعان. قىزدى يت اۋزىنان اجەسى امان الىپ قالادى. باسى مەن كەۋدە تۇسىنان جاراقاتتانعان بالا مەديتسينالىق مەكەمەگە جەتكىزىلىپ, دارىگەرلەر كومەك كورسەتكەن سوڭ ۇيىنە جىبەرىلدى», دەدى پوليتسيانىڭ ءباسپاسوز قىزمەتى.
يەسى ءيتتىڭ بايلاۋلى تۇرعانىن, الايدا وزدەرى جوقتا شىنجىردان بوساپ كەتكەنىن ايتقان.
«اۋىل تۇرعىنىنا قاتىستى پوليتسيا قىزمەتكەرلەرى 407-2-باپتىڭ 1-بولىگىنىڭ 4-تارماعى ء(ۇي جانۋارلارىن ۇستاۋ جانە سەرۋەندەتۋ ەرەجەلەرىن بۇزۋ) بويىنشا اكىمشىلىك حاتتاما تولتىردى. يەسىنە 10 ايلىق ەسەپتىك كورسەتكىش مولشەرىندە ايىپپۇل سالۋ قاراستىرىلىپ وتىر», دەپ تولىقتىردى ءباسپاسوز قىزمەتىندەگىلەر.