17 ءساۋىر كۇنى نۇر-سۇلتان قالاسىنىڭ ورتالىق تسيرك اۋماعىنا جۇزدەگەن ادام جينالدى. ولار بيلىكتەن تورعاي وبلىسىن قايتا قۇرۋدى تالاپ ەتتى, دەپ حابارلايدى Egemen.kz.
بەيبىت ميتينگ اكىمدىكتىڭ رۇقساتىمەن ۇيىمداستىرىلعان. جيىندا زيالى قاۋىم وكىلدەرى, قوعام قايراتكەرلەرى, جۋرناليستەر ءسوز سويلەدى. ولار بىرنەشە رەت جابىلعان تورعاي وبلىسىن قايتا قۇرۋ جونىندەگى ۇسىنىستارىن ورتاعا تاستادى. بۇرىنعى وبلىستىڭ قازىرگى جاعدايىن سىنعا الدى. سونداي-اق كۇردەلى ماسەلەلەردىڭ شەشۋ جولىن ۇسىندى.
ءىس-شارا نەگىزىندە ارنايى قارار ازىرلەنەتىن بولدى. وعان ميتينگتە ايتىلعان ورامدى ويلار مەن تىڭ ۇسىنىستار جانە كوپشىلىكتىڭ پىكىرى ەنگىزىلەدى.
جۇيەلى ۇيىمداستىرىلعان بەيبىت ميتينگ بەلگىلەنگەن ۋاقىتتا اياقتالدى. جيىلعان حالىقتىڭ ءبىر بولىگى ەلورداداعى امانگەلدى يمانوۆ اتىنداعى كوشەدە سەنبىلىك جۇمىستارىن جۇرگىزدى.
ايتا كەتسەك, تورعاي وبلىسى 1970 جىلدىڭ قاراشا ايىندا قازاق كسر قۇرامىنداعى قوستاناي مەن اقمولا وبلىسىنىڭ كەي اۋداندارىن بىرىكتىرۋ ارقىلى قۇرىلعان. وبلىس 1988 جىلى تاراتىلىپ, 1990 جىلى قايتا قۇرىلعان ەدى. ال ارادا 7 جىل وتكەن سوڭ تورعاي وبلىسى قايتادان تاراتىلعان.