وڭىردە ەكى ايلىق سانيتارلىق تازالىق شارالارى باستالدى. وسىعان وراي قوستانايدا ۇيىمداستىرىلعان العاشقى سەنبىلىكتە قالا كوشەلەرى مەن ساياباقتار قار استىنان شىققان قوقىستان تازارتىلىپ, جۇزدەگەن اعاش كوشەتى وتىرعىزىلدى. ال قالاداعى ترياتلون-پاركتىڭ جانىنداعى الاڭقاي ەندى «جاس وتباسىلار» اللەياسى دەپ اتالاتىن بولدى. بۇعان دەيىن اشىق جاتقان تاقىر جەرگە ۆولونتەر جاستار, سپورتشىلار, ۇستازدار مەن ەكوبەلسەندىلەر, سونداي-اق ون شاقتى جاس وتباسى ارنايى كەلىپ قايىڭ كوشەتتەرىن وتىرعىزدى.
كوپشىلىك تاراپىنان قولداۋ تاپقان يگى باستامانى كوتەرىپ جۇرگەن «جاناشىر بول» قوعامدىق قورى ەكەن.
– بۇگىن وتىرعىزىلعان كوشەتتەر تامىرى بەكىپ, بويلاپ وسكەنشە سۋارىپ, كۇتىمگە الۋ جاعىن ءبىزدىڭ ەرىكتىلەر ءوز مويىندارىنا الىپ وتىر. بيىل وتىرعىزىلعان وتىز شاقتى كوشەت, وسىنداي يگى شارالار ءجيى بولىپ تۇرسا, جىل سايىن كوبەيىپ, الداعى ۋاقىتتا ۇلكەن ساياباققا اينالار دەگەن ءۇمىتىمىز بار. اسىرەسە كوكتەمدە باس قوسىپ, شاڭىراق كوتەرگەن جاس وتباسىلار وسى جەرگە كەلىپ ەكى ءتۇپ اعاش وتىرعىزۋدى داستۇرگە اينالدىرادى دەگەن ويدامىن, – دەدى قوردىڭ ءتورايىمى ءسابينا راسپەكوۆا.
ءىس-شاراعا اتسالىسقان ءاربىر وتباسى وزدەرى وتىرعىزعان قوس ءتۇپ اعاشتىڭ جانىندا ەستەلىك سۋرەتكە ءتۇسىپ, اعاش ءوسىپ تۇرعان ورىندى كەيىن اداسپاي تاۋىپ الاتىنداي ەتىپ بەلگى قويىپ جاتتى. بىلتىر عانا شاڭىراق قۇرعان ەرلى-زايىپتى رۋسلان ياسمەنكو مەن اننا سميرنوۆا ءۇش ءتۇپ اعاش وتىرعىزىپتى.
– مۇنداي شارالارعا العاش رەت قاتىسىپ وتىرمىز. بىرىنشىدەن, ءوزىمىزدىڭ قورشاعان ورتانى جاسىلداندىرۋعا اتسالىسقانىمىزعا قۋانامىز. ەكىنشىدەن, كەلەشەكتە بالا-شاعامىزدى وسى جەرگە ەرتىپ كەلىپ, ءوزىمىز وتىرعىزعان اعاشتاردى كورسەتىپ, ولارعا ءوز ءىسىمىزدى ۇلگى-ونەگە ەتەمىز, – دەيدى رۋسلان ياسمەنكو.
Neco قوعامدىق قورىنىڭ جەتەكشىسى ناۋرىزبەك بىرماعامبەتوۆتىڭ ايتۋىنشا, جاس وتباسىلار اللەياسىنا كەلەشەكتە قايىڭنان بولەك ءار ءتۇرلى اعاش كوشەتتەرىن وتىرعىزعان ابزال. جالپى, بيىل وبلىس اۋماعىن جاسىلداندىرۋعا 700 ملن تەڭگە ءبولىنىپ وتىر.
قوستاناي وبلىسى