قوستاناي وبلىستىق سانيتارلىق-ەپيدەميولوگيالىق باقىلاۋ دەپارتامەنتى كەنە شاعىپ العان 6 ادامنىڭ دارىگەر كومەگىنە جۇگىنگەنىن مالىمدەدى. ولاردىڭ ىشىندە 10 جاستاعى بالا بار. ماماندار كەنەنىڭ جىلداعى مەرزىمنەن ەرتە كوبەيىپ كەتۋىنىڭ سەبەبى اۋا رايىنىڭ كۇرت ىسىپ كەتۋىمەن بايلانىستى دەپ وتىر.
قانسورعىش جاندىكتەر ەنتسەفاليت, بوررەليوز ءتارىزدى جۇقپالى اۋرۋلار تاراتادى. ازىرگە كەنە شاعىپ ەمدەۋ مەكەمەلەرىنە جۇگىنگەندەردەن ونداي قاۋىپتى دەرت انىقتالعان جوق.
– كەنە شاققان التى ادامنىڭ ءبارى دارىگەرلەردىڭ باقىلاۋىنا الىندى. ولاردىڭ دەنساۋلىعى ءۇش اپتا بويى ءجىتى قاداعالانادى. سونداي-اق قازىر اشىق دالادا, ەگىن القاپتارىندا, مال شارۋاشىلىعىندا ەڭبەك ەتىپ جۇرگەن ادامدارعا ەكپە جاسالادى. ءبىز تۇرعىنداردى اسا ساق بولۋعا شاقىرامىز. كەنە شاققان ادام دەرەۋ دارىگەرگە قارالماسا, اسقىنعان اۋرۋ داۋاسىز دەرتكە ۇلاسۋى مۇمكىن, – دەدى سانيتارلىق-ەپيدەميولوگيالىق باقىلاۋ دەپارتامەنتىنىڭ ءبولىم باسشىسى ليۋدميلا نالوبينا.
قاۋىپتىڭ الدىن الۋ ماقساتىندا وبلىستىق سەب دەپارتامەنتى مەن ۇلتتىق ساراپتاما ورتالىعى فيليالىنىڭ ماماندارى قوستاناي جانە التىنسارين اۋداندارىنداعى ەلدى مەكەندەردىڭ ماڭايىنان كەنە جيناپ, جاندىكتەردىڭ قانداي دەرتتىڭ قوزدىرعىشتارىن تاراتۋى مۇمكىن ەكەنىن انىقتاماق.
قوستاناي وبلىسى