بۇل تۋرالى قىرعىزستاننىڭ قىلمىستىق اتقارۋ قىزمەتى ءمالىم ەتتى, دەپ حابارلايدى Egemen.kz.
«المازبەك اتامباەۆ شۋ وبلىسى, ءالامۇدۇن اۋدانى مولدوۆانوۆكا اۋىلىنداعى جالپى رەجيمدەگى 27 مەكەمەگە اۋىستىرىلدى», دەدى قىزمەت وكىلى.
بۇعان دەيىن قىرعىزستاننىڭ بۇرىنعى پرەزيدەنتى المازبەك اتامباەۆ شۋ وبلىسى پەتروۆكا اۋىلىنداعى 8-ءشى تۇزەۋ كولونياسىنا اۋىستىرۋدى سۇراعان. وعان دەيىن ول بىشكەك قالاسىنداعى گوسپيتال تيپىندەگى 47-كولونيادا جازاسىن وتەگەن.
2011-2017 جىلدار ارالىعىندا قىرعىزستان پرەزيدەنتى بولعان اتامباەۆ 2019 جىلى ماۋسىمدا پرەزيدەنتتىك يممۋنيتەتىنەن ايىرىلىپ, وعان جەمقورلىق ءۇشىن ايىپ تاعىلعان بولاتىن. ول 2019 جىلدىڭ 8 تامىزىندا بىشكەك ىرگەسىندەگى قوي-تاش اۋىلىنداعى تارتىپسىزدىكتەردەن كەيىن ۇستالدى.
2020 جىلدىڭ قازان ايىندا ەل پرەزيدەنتى سوورونباي جەەنبەكوۆتىڭ وتستاۆكاعا كەتۋىنە اكەلگەن وپپوزيتسيا جاقتاستارى مەن قاۋىپسىزدىك كۇشتەرى اراسىنداعى قاقتىعىستاردان كەيىن بيلىككە ەلدىڭ قازىرگى پرەزيدەنتى سادىر جاپاروۆ كەلدى. سودان كەيىن بىرقاتار ساياسي تۇتقىندار, سونىڭ ىشىندە اتامباەۆ تۇرمەدەن بوساتىلدى, بىراق بىرنەشە كۇننەن كەيىن ول بىشكەكتىڭ ورتالىعىندا جاپپاي تارتىپسىزدىكتەر ۇيىمداستىردى دەگەن ايىپپەن ۇستالدى.