جاڭا مودەل ەنگىزىلگەننەن بەرى پروكۋرور ءفيلترى ارقىلى 500 مىڭنان استام تەرگەۋ شەشىمى ءوتتى. بۇل تۋرالى قر باس پروكۋرورىنىڭ ورىنباسارى اسەت شىنداليەۆ ءمالىم ەتتى, دەپ حابارلايدى Egemen.kz.
«تەرگەۋ مەن سوتتاردا زاڭدىلىقتى قامتاماسىز ەتۋ بويىنشا پروكۋراتۋرا ورگاندارى جۇمىسىنىڭ نەگىزگى اسپەكتىلەرىنە توقتاپ كەتسەم دەيمىن. مەملەكەت باسشىسى قىلمىستىق وربيتاعا تارتىلعان ادام قۇقىقتارىن قورعاۋدى كۇشەيتۋگە تۇراقتى نازار اۋدارىپ كەلەدى. پرەزيدەنتتىڭ تاپسىرماسىمەن 2020 جىلدان بەرى قىلمىستىق پروتسەسكە كەزەڭ-كەزەڭمەن ءۇش بۋىندى مودەل ەنگىزۋ باستالدى. بۇنداي تاجىريبەنى ءبىز ەىدۇ ەلدەرىنەن الىپ وتىرمىز. ونىڭ نەگىزگى مازمۇنى – پوليتسيا, پروكۋراتۋرا جانە سوت اراسىندا وكىلەتتىكتەردى ناقتى ءبولۋ. بۇل ءتارتىپ بويىنشا پوليتسيا ايعاقتاردى جيناپ, ولاردى بەكىتەدى. پروكۋرور ماڭىزدى شەشىمدەردى قابىلداۋعا كەلىسىم بەرەدى جانە ءىستى سوتقا جولدايدى. سوت بولسا باقىلاۋ جاسايدى, ۇكىم شىعارادى جانە جازا بەلگىلەيدى», دەدى شىنداليەۆ ورتالىق كوممۋنيكاتسيالار قىزمەتىندە.
وسى ورايدا ول جاڭا مودەلدىڭ ءبىرىنشى كەزەڭى 2020 جىلى ەنگىزىلگەنىن ەسكە سالدى. وسى مودەل بويىنشا پروكۋرور تەرگەۋدىڭ نەگىزگى شەشىمدەرىنە كەلىسىم بەرەدى. بۇل – ادامدى كۇدىكتى دەپ تانۋ, ونىڭ جاساعان ارەكەتىن سارالاۋ, ءىستى توقتاتۋ نەمەسە قىسقارتۋ جانە باسقا شەشىمدەر. ولاردى پروكۋرور ماقۇلداماسا تەرگەۋ شەشىمدەرىنىڭ زاڭدى كۇشى بولمايدى.
«قىلمىستىق-پروتسەستىك كودەكستە كەلىسىم بەرۋ مەرزىمدەرى جانە ونىڭ بارلىق پروتسەدۋرالىق تۇستارى ناقتى جازىلدى. كەلىسىم بەرۋ پروتسەسى «سوتقا دەيىنگى تەرگەپ-تەكسەرۋدىڭ بىرىڭعاي ءتىزىلىمى» (ەردر) ارقىلى ەلەكتروندى تۇردە ونلاين فورماتتا وتكىزىلەدى. تەرگەۋشى ازىرلەگەن بويدا قاۋلى ەلەكتروندىق جۇيەدە بىردەن پروكۋرورعا تۇسەدى. ەگەر شەشىم زاڭدى بولسا, پروكۋرور وعان تسيفرلى قول قويىپ, سول ساتتە ونى تەرگەۋشىگە قايتارادى. جاڭا مودەلدى ەنگىزگەن ۋاقىتتان بەرى پروكۋرور ءفيلترى ارقىلى 500 مىڭنان استام تەرگەۋ شەشىمى ءوتتى. ناتيجەسى ويداعىداي. تەرگەۋ ساپاسى جاقسارىپ, زاڭسىز شەشىمدەر سانى ازايدى», دەدى باس پروكۋروردىڭ ورىنباسارى.