15 ساۋىردەن باستاپ قارجى مينيسترلىگىنىڭ مەملەكەتتىك كىرىستەر كوميتەتى جەكە تۇلعالاردىڭ بانك شوتتارىنىڭ اراسىنداعى ءموبيلدى اقشا اۋدارىمدارىنا مونيتورينگ جۇرگىزە باستايدى, دەپ حابارلايدى Egemen.kz.
بۇعان دەيىن حابارلانعانداي, ءبىر ادامنىڭ جەكە تۇلعا رەتىندە اشقان بانك شوتىنا 3 ايدىڭ ىشىندە 100 جانە ودان دا كوپ ادامنىڭ بانك شوتىنان اقشا اۋدارىلعان بولسا, بۇل كاسىكەپرلىك قىزمەتتەن پايدا تابۋ بولىپ ەسەپتەلەدى.
قارجى ءمينيسترىنىڭ ءتيىستى بۇيرىعى بۇگىننەن باستاپ كۇشىنە ەندى. سالىق زاڭناماسىنا سايكەس, ءموبيلدى اۋدارىمداردى پايدالانۋعا قاتىستى ەنگىزىلگەن وزگەرتۋلەر, جەكە تۇلعالاردىڭ جەكە اۋدارىمدارىن كاسىپكەرلىك ماقساتتا جۇزەگە اسىرىلاتىن ءموبيلدى تولەمدەردەن بولۋگە ارنالعان. ولار بيزنەس قاۋىمداستىقپەن جانە بانكتەرمەن بىرنەشە رەت تالقىلاندى.
بۇل باستامالاردىڭ ماقساتى تسيفرلىق كەڭىستىكتە بيزنەستى دامىتۋدى كوزدەيدى, قولما-قول اقشاعا كوشۋدى مۇلدەم كوزدەمەيتىنىن ەسكەرىڭىز. مۇنىمەن قوسا, بارلىق مالىمەتتەر مەملەكەتتىك كىرىس ورگاندارىنا بەرىلەدى ەكەن دەگەن اقپارات تا نەگىزسىز. جالپى جەكە اۋدارىمدارعا سالىق سالىنبايدى. وتكەن جىلدىڭ قاراشا ايىندا سەناتتا ءموبيلدى اۋدارىمعا قاتىستى ارنايى زاڭ قارالدى.
جيىندا سەناتور: «پاندەميا كەزىندە ساۋدا جانە قىزمەت كورسەتۋ سالاسىنداعى شاعىن جانە ورتا بيزنەس سۋبەكتىلەرى كاسىپكەرلىك قىزمەتتە جەكە تۇلعالار اراسىنداعى ترانزاكتسيالارعا ارنالعان جەدەل ءموبيلدى اۋدارىمداردى بارلىق جەردە پايدالانا باستادى. بۇل ماسەلەنى زاڭنامالىق رەتتەۋ ماقساتىندا: ء«موبيلدى تولەمدەر» تۇسىنىگىن انىقتاۋ, موبيلدىك تولەمدەر ارقىلى تاۋارلار مەن كورسەتىلەتىن قىزمەتتەرگە اقى تولەۋ ءۇشىن ەسەپ ايىرىسۋلار كەزىندە ونلاين-باقىلاۋ-كاسسا ماشينالارىن قولدانۋدى زاڭداستىرۋ, كاسىپكەرلەردى بيزنەستى جۇرگىزۋگە ارنالعان جەكە شوتتاردى پايدالانۋعا مىندەتتەۋ, بانكتەردى مەملەكەتتىك كىرىستەر ورگاندارىنا ءتيىستى مالىمەتتەردى بەرۋ ۇسىنىلادى», دەدى.