شىعىس قازاقستان وبلىسى بەسقاراعاي اۋدانىندا 48 گەكتارعا جايىلعان ءىرى ءورت اۋىزدىقتالدى, دەپ حابارلايدى Egemen.kz.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, سوڭعى تاۋلىك ىشىندە ءوڭىر بويىنشا 5 ءورت شىققان.
سەمەيدەگى سۆيازيستوۆ كەنتىندە ورنالاسقان ساياجاي وتقا وراندى. جالپى اۋدانى 35 شارشى مەتردى قۇراعان جالىن كىرەبەرىستى, تەرەزە, ەسىك بلوكتارى مەن شاتىردى شارپىعان.
«بەسقاراعاي اۋدانىندا 48 گەكتار الاڭدا ءشوپ ورتەندى. ءتىلسىز جاۋ سول ماڭداعى شارۋا قوجالىعىنىڭ عيماراتتارى مەن 70 توننا پىشەنگە جايىلىپ كەتكەن. ءورتتىڭ شىعۋىنا – وتتى ابايسىز قولدانۋ سەبەپ بولۋى مۇمكىن», دەلىنگەن اقپاراتتا.
اياگوز قالاسى دۇيسەنباەۆ كوشەسىندەگى جەكە تۇرعىن ءۇيدىڭ اۋلاسىندا بالالار قۋراعان اعاشتى ورتەگەن.
لەزدە جان-جاققا تاراعان جالىننىڭ اۋماعى 35 شارشى مەترگە جەتىپ, سول ماڭدا سالىنىپ جاتقان ۇيگە قاۋىپ ءتوندى.
قۇتقارۋشىلار جەدەل كومەككە كەلىپ, ءورتتى ءسوندىردى.
«وسكەمەندە زايسان كوشەسىندەگى جەر ۇيدە ءورت بولدى. ءتىلسىز جاۋدىڭ جالپى اۋدانى 100 شارشى مەتردى قۇراعان. ءورت سوندىرۋشىلەر ۇيدەن 4 گاز باللونىن شىعارىپ ۇلگەردى», دەلىنگەن حابارلامادا.
سونداي-اق شەمونايحا اۋدانىندا جەر ءۇي مەن شارۋاشىلىق قورا-جاي ورتەنگەن.