مەملەكەت باسشىسىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعى بويىنشا پرەمەر-مينيستر كەڭسەسىندە قۇجاتتاردى قاراۋ مەرزىمىن ەكى ەسە قىسقارتۋ شەشىمى قابىلداندى, دەپ حابارلايدى Egemen.kz.
بۇل تاپسىرما ەكى اي ىشىندە جۇزەگە اسۋى ءتيىس.
«پرەمەر-مينيستر كەڭسەسىندە قۇجاتتاردى قاراۋ مەرزىمدەرىنىڭ ەكى ەسەگە قىسقارتىلۋىن قامتاماسىز ەتسىن», دەلىنگەن پرەزيدەنت جارلىعىندا.
جارلىققا سايكەس حاتتامالاردى قاراۋ قۇزىرەتى جوق ورگاندارعا اكتىلەردىڭ جوبالارى مەن كەڭەستەردىڭ حاتتامالارىن جىبەرۋگە تىيىم سالىنادى. ال مەملەكەتتىك ورگانداردىڭ ءبىرىنشى باسشىلارىنىڭ ۇيىمداستىرۋشىلىق-تەحنيكالىق سيپاتتاعى قۇجاتتارعا قول قويۋ, سونداي-اق ۆەدومستۆوارالىق كەڭەستەرگە قاتىسۋ جانە وندا مەملەكەتتىك ورگاننىڭ ۇستانىمىن ءبىلدىرۋ قۇقىعىن مەملەكەتتىك ورگانداردىڭ قۇرىلىمدىق بولىمشەلەرىنىڭ جەكەلەگەن باسشىلارىنا جۇكتەلەدى.
«ۇكىمەت وتىرىستارى مەن ۇكىمەت جانىنداعى كونسۋلتاتيۆتىك-كەڭەسشى ورگاندار وتىرىستارىنىڭ, سونداي-اق پرەمەر-ءمينيستردىڭ ورىنباسارلارى مەن پرەمەر-مينيستر كەڭسەسى باسشىلىعىنىڭ باسقارۋىمەن وتكەن كەڭەستەردىڭ حاتتامالارىن قاتىسقان مەملەكەتتىك ورگاندارمەن كەلىسۋ قاجەتتىلىگىن جويا وتىرىپ, ولارعا قول قويۋ مەرزىمىنىڭ ءۇش كۇنگە دەيىن قىسقارتىلۋىن قامتاماسىز ەتە وتىرىپ, قايتا قاراسىن», دەلىنگەن جارلىقتا.