ساۋدا جانە ينتەگراتسيا مينيسترلىگى ساۋدا كوميتەتى توراعاسىنىڭ ورىنباسارى ايدار ابىلدابەكوۆ ءمالىم ەتكەندەي, الماتى قالاسىنداعى «التىن وردا» بازارىنىڭ قىزمەتىن تەكسەرۋ بارىسىندا 1 ميلليارد 600 ميلليون تەڭگە كولەمىندەگى زاڭبۇزۋشىلىق انىقتالدى, دەپ حابارلايدى Egemen.kz.
«مەملەكەت باسشىسىنىڭ تىكەلەي تاپسىرماسىنا سايكەس, باس پروكۋراتۋرا ەلىمىزدەگى ساۋدا ورىندارى مەن بازارلاردىڭ قىزمەتىن تەكسەرۋدى تاپسىردى. وسى ورايدا بارلىق وڭىردە ارنايى توپتار قۇرىلدى. ولاردىڭ قۇرامىنا جەرگىلىكتى اكىمدىك, سالىق, ساۋدا دەپارتامەنتى, باسەكەلەستىكتى قورعاۋ جانە دامۋ دەپارتامەنتى مەن باسقا دا قۇزىرلى ورگان وكىلدەرى كىردى. وسىلايشا «التىن وردا» بازارىنىڭ قىزمەتىن 70 ادامنان تۇراتىن توپ تەكسەردى. تەكسەرۋ بارىسىندا 1 ميلليارد 600 ميلليون تەڭگە كولەمىندەگى كەمشىلىك تابىلدى», دەدى ا. ابىلدابەكوۆ.
ونىڭ ايتۋىنشا, تەكسەرۋ ناتيجەلەرى ءالى تولىق شىقپاعان.
«ماسەلەن بازارداعى كەيبىر نىساندار زاڭسىز سالىنعان. بازاردى تەكسەرۋدىڭ تولىق قورىتىندىسى ءالى شىقپاعان. ويتكەنى اتقارىلعان جۇمىس وتە اۋقىمدى. مەنىڭ ايتىپ وتىرعانىم - بىزگە جەتكەن العاشقى دەرەكتەر», دەدى ول.
ايتا كەتسەك, «التىن وردا» - ەلىمىز بويىنشا عانا ەمەس, ورتالىق ازياداعى ەڭ ءىرى بازارلاردىڭ ءبىرى. ونىڭ اۋماعى - 28-29 گەكتاردى قۇرايدى.