تۇرىكمەنستان ايەلدەرىنە كىرپىك ۇزارتۋعا, جاساندى تىرناق وسىرۋگە, ەرىندى ۇلكەيتۋگە تىيىم سالىندى. تىيىمدى بۇزعان سىلقىمدار مەن سالون يەلەرى ايىپپۇل ارقالاۋى نەمەسە 15 تاۋلىككە قامالۋى مۇمكىن, دەپ حابارلايدى Egemen.kz.
«راديو ازاتلىك» سايتىنىڭ جازۋىنشا, مارى وبلىسىنا قاراستى بايرامالى قالاسىنىڭ پوليتسيا قىزمەتكەرلەرى جەرگىلىكتى سۇلۋلىق سالوندارىنا بارىپ, كەيبىر قىزمەتتەردى كورسەتۋگە تىيىم سالعان.
ولار بوتوكس, كىرپىك ۇزارتۋ, ەرىن ۇلكەيتۋ جانە جاساندى تىرناق جالعاۋ سياقتى قىزمەتتەر كورسەتۋگە تىيىم سالىنعانىن ەسكەرتتى, دەيدى سۇلۋلىق سالوندارىنىڭ ءبىرىنىڭ قىزمەتكەرى.
دەگەنمەن شەبەردىڭ ايتۋىنشا, ءتارتىپ ساقشىلارى تىيىمنىڭ ەنگىزىلگەنىن راستايتىن ەشقانداي قۇجات كورسەتپەگەن, سەبەبىن تۇسىندىرمەگەن.
پوليتسەيلەر تىيىمدى بۇزىپ, جوعارىدا اتالعان قىزمەتتەرگە جۇگىنگەن ايەلدەر ۇستالىپ, ايىپپۇل سالىنۋى مۇمكىن ەكەنىن ەسكەرتەدى. بۇل تىيىم سالون يەلەرىنە دە قاتىستى.