شىمكەنتتە شاعىن كرەديت ۇيىمىنىڭ كاسسيرى قاراقشىلىق شابۋىل جاسالعانى تۋرالى جالعان حابار بەرگەن, دەپ حابارلايدى Egemen.kz Polisia.kz-كە سىلتەمە جاساپ.
ەڭبەكشى پوليتسيا باسقارماسىنىڭ كەزەكشى بولىمىنە شاعىن كرەديت بەرەتىن كومپانيادان قوڭىراۋ تۇسكەن. قىزمەتكەر ولارعا شابۋىل جاسالعانىن حابارلاعان.
وقيعا ورنىنا جەدەل-تەرگەۋ توبى مەن اۋداندىق پروكۋرورلار كەلدى. كاسسيردىڭ ايتۋىنشا, ساعات 18.30-دا ورتا بويلى, مەديتسينالىق ماسكا تاققان, كوزىلدىرىك كيگەن شامامەن 30-35 جاستاعى ەر ادام كىرگەن. ول پىشاقپەن قورقىتىپ, 1 ميلليون تەڭگەگە جۋىق اقشا الىپ, قاشىپ كەتكەن. تەرگەۋشىلەر قىلمىستىق كودەكستىڭ 192-بابى «قاراقشىلىق» بويىنشا سوتقا دەيىنگى تەرگەۋدى باستادى. ال كريمينالدىق پوليتسيا قىزمەتكەرلەرى كۇدىكتىنىڭ جەكە باسىن انىقتاۋ بويىنشا بارلىق قاجەتتى ءىس-شارانى جۇرگىزدى. كۇدىكتىنىڭ فوتوروبوتى جاسالىپ, كورشى وبلىستارعا دەيىن تاراتىلدى. قاراقشىلىق بولعان نىسانعا كورشى ورنالاسقان دۇكەن ساتۋشىلارىنان دا سۇراستىرعان. ناتيجەسىندە ءبىر تاۋلىك ىشىندە پوليتسەيلەر كۇدىكتىنىڭ ىزىنە ءتۇستى. ول جەرگىلىكتى تۇرعىن بولىپ شىقتى. ول ۇيىندە ۇستالىپ, پوليتسيا باسقارماسىنا جەتكىزىلدى. سوتقا دەيىنگى تەرگەۋ بارىسىندا كاسسير كاسسادا ءتيىستى سومانىڭ بولماۋىنا بايلانىستى قاراقشىلىق ارەكەتتى ءوزى ۇيىمداستىرعانى انىقتالدى. ول بۇل ويىن جۇزەگە اسىرۋ ءۇشىن دوسىنان كومەك سۇراعان. قازىر وسى فاكتى بويىنشا قىلمىستىق كودەكستىڭ 419-بابى بويىنشا تەرگەۋ جۇرگىزىلىپ جاتىر.شىمكەنت پوليتسياسى ازاماتتارعا قىلمىس تۋرالى جالعان حابارلاما ءۇشىن قىلمىستىق جاۋاپكەرشىلىك قاراستىرىلعانىن ەسكەرتتى.