ارنايى پروكۋرورلار قاڭتارداعى جاپپاي تارتىپسىزدىككە 12 ۇيىمداسقان قىلمىستىق توپتىڭ قاتىسقانىن انىقتادى, دەپ حابارلايدى Egemen.kz.
بۇل تۋرالى باس پروكۋراتۋرانىڭ 1 قىزمەت باستىعىنىڭ ورىنباسارى ەلدوس قيلىمجانوۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.
«12 ۇيىمداسقان قىلمىستىق توپتىڭ ىشىندە ەڭ بەلسەندىلەرى – «ديكي ارمان», «قازاقستاندىقتار» جانە «ايشۋاق-جانتۇگەل» توپتارى بولدى. ۇيىمداسقان قىلمىستىق توپتىڭ 23 مۇشەسى قاماۋعا الىندى», دەدى باس پروكۋراتۋرا وكىلى.
سونداي-اق ول ۇستالعاندار اراسىندا قىلمىس الەمىنىڭ 4 بەدەلدى تۇلعاسى بار ەكەنىن اتاپ ءوتتى.
«ونىڭ ىشىندە 4 قىلمىس اۆتوريتەتى بار. بۇل قىلمىستاردى ۇيىمداستىرۋشىلار مەن قاتىسۋشىلاردى انىقتاپ, جاۋاپقا تارتۋ ءۇشىن بارلىق قاجەتتى شارالار قابىلدانۋدا. بۇگىنگى تاڭدا جاپپاي تارتىپسىزدىكتى ۇيىمداستىرۋ جانە قاتىسۋ بويىنشا 547 ادام كۇدىكتى رەتىندە تانىلىپ, ونىڭ 269-ى قاماۋعا الىندى», دەدى ەلدوس قيلىمجانوۆ.
ەسكە سالساق, بۇعان دەيىن قر پرەمەر-ءمينيسترىنىڭ ورىنباسارى ەرالى توعجانوۆ قاڭتار وقيعاسى كەزىندە قازا بولعان كۇش قۇرىلىمدارى قىزمەتكەرلەرىنىڭ وتباسىنا پاتەر بەرىلەتىنىن ايتقان بولاتىن.