قازىرگى كەزدە مۇگەدەكتىكتى بەلگىلەۋ بويىنشا 11 مىڭنان استام ءوتىنىم سىرتتاي فورماتتا راسىمدەلدى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
قازىرگى ۋاقىتتا پيلوتتىق جوباعا 487 مەديتسينالىق ۇيىم قوسىلعان.
«مەملەكەت باسشىسى ەرەكشە قاجەتتىلىكتەرى بار ادامدار ءۇشىن بارىنشا قولايلى جاعداي جاساۋدى, ولاردىڭ ينستانتسيالار مەن قاعازباستىلىق بويىنشا ءجۇرۋىن, سونداي-اق قىزمەت كورسەتۋشىلەردىڭ قىزمەت الۋشىلارمەن بايلانىسىن بولدىرماۋدى تاپسىردى. وسىعان بايلانىستى دەنساۋلىق ساقتاۋ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىمەن بىرلەسىپ, قازاقستاننىڭ 17 وڭىرىندە مەديتسينالىق-الەۋمەتتىك ساراپتاما جۇرگىزۋدىڭ سىرتتاي فورماتى جوباسىن ىسكە قوستىق. قىزمەت الۋ ءۇشىن ءوتىنىش بەرۋشى تەك تۇرعىلىقتى جەرى بويىنشا ەمحاناعا بارىپ, قاجەتتى تەكسەرۋدەن ءوتۋى كەرەك, ال قالعان پروتسەستەر اقپاراتتىق جۇيەلەردى ينتەگراتسيالاۋ ەسەبىنەن ونىڭ قاتىسۋىنسىز وتەدى», دەپ جازىلعان حابارلامادا.
پيلوتتىق جوبا ارقىلى 2022 جىلى مۇگەدەكتىكتى بەلگىلەۋ بويىنشا قىزمەتتەردى سىرتتاي كورسەتۋمەن قامتۋدى مۇگەدەكتىگى بار ادامداردىڭ 20 %-ىنا دەيىن جەتكىزۋ جوسپارلانۋدا.