ەلوردادا ءتارتىپ ساقشىلارى 88 جاستاعى زەينەتكەرگە شابۋىل جاساعان قاراقشىنى ۇستادى, دەپ حابارلايدى Egemen.kz نۇر-سۇلتان پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
كريمينالدىق پوليتسيا قىزمەتكەرلەرى جەدەل-ىزدەستىرۋ ءىس-شارالارى بارىسىندا قاراقشىلىق شابۋىل جاسادى دەگەن كۇدىكتى ازاماتتى ۇستادى.
«تۇندە بەلگىسىز ەر ادام 88 جاستاعى قاريانىڭ ەسىگىن قاعىپ, اشۋىن سۇراعان. قاريا ەسىكتى اشقان ساتتە ەر ادام ونى ۇرىپ, توناي باستاعان», دەپ حابارلادى پوليتسەيلەر.
قاراقشى قاريانىڭ التىن ساقيناسىن شەشىپ العان جانە بولمەنى مۇقيات قاراپ تاعى ءبىر التىن ساقينا الىپ شىققان.تەرگەۋ بارىسىندا قاسكۇنەمنىڭ زاتاەۆيچ كوشەسىندە پاتەر جالداعانى انىقتالدى.
«قاراما-قارسى پاتەردە جالعىز ادام تۇراتىنىن ءبىلىپ, قاساقانا بارعان. ەلوردا پوليتسەيلەرى 28 جاستاعى كۇدىكتىنى ۇستادى. ول التىن بۇيىمداردى لومباردقا تاپسىرىپ ۇلگەرگەن. بۇعان دەيىن ونىڭ ۇرلىق ءۇشىن سوتتالعانى انىقتالدى», دەپ ءتۇسىندىردى ءباسپاسوز قىزمەتى.
ۇستالعان ازامات نۇر-سۇلتان قالالىق پوليتسياسىنىڭ ۋاقىتشا ۇستاۋ يزولياتورىنا قامالدى.