قارقارالى تۇرعىندارى ءار ءۇيدىڭ ساپالى سۋمەن جابدىقتالۋىن ۇزاق ۋاقىت كۇتىپ كەلەدى. بۇل ماسەلەنى شەشۋ ءۇشىن قالادا جارلى-قارقارالى سۋ قۇبىرى سالىنۋدا, دەپ حابارلايدى Egemen.kz.
بيىل نەگىزگى جۇمىستار جۇرگىزىلەدى, ال كەلەسى جىلى نىسان تاپسىرىلۋى ءتيىس.
وتكەن جىلى جەر استى سۋى شوعىرلانعان ورىندا ءتورت ۇڭعىما بۇرعىلاندى. قارقارالى اۋدانىنىڭ اكىمى ەلدار دۇيسەتاەۆ بيىل جۇمىستاردىڭ نەگىزگى بولىگى اتقارىلاتىنىن حابارلادى. سورعى ستانتسيالارىن سالۋ, رەزەرۆۋارلاردى تولتىرۋ جانە قۇبىرلار سالۋ جوسپارلانۋدا. سۋ تاراتقىشتىڭ ۇزىندىعى 40 شاقىرىمدى قۇرايدى, جوبا رەسپۋبليكالىق بيۋدجەتتەن قارجىلاندىرىلادى.
جەڭىس قاسىمبەك اۋدانعا ءىس ساپارى بارىسىندا جۇمىستاردىڭ ساپاسىن باقىلاۋدى تاپسىردى. ول قارقارالى تابيعاتى قۇرىلىسشىلاردىڭ ارالاسۋىنان زارداپ شەكپەۋى ءتيىس ەكەنىن اتاپ ءوتتى.
«جوبا وتە ماڭىزدى. تۇرعىندار ونى كۇتىپ وتىر. كەلەسى جىلى تولىق اياقتاۋ كەرەك», دەپ اتاپ ءوتتى جەڭىس قاسىمبەك.
اۋداننىڭ باسقا ەلدى مەكەندەرىنىڭ تۇرعىندارى دا ساپالى اۋىز سۋمەن قامتاماسىز ەتىلەدى.