بۇگىن, 5 ءساۋىر كۇنى بۇكىلالەمدىك بوكس سەرياسى (WSB) 2013-2014 جىلعى ماۋسىمىنىڭ ەكىنشى شيرەك فينالدىق كەزدەسۋىندە گەرمانيانىڭ Team Germany كومانداسىن 5:0 ەتىپ تىزە بۇكتىرگەن Astana arlans جاماعاتى جارتىلاي فينالعا جولداما الدى. بۇل تۋرالى Egemen.kz حابارلادى.
قازاقستاندىق بىلعارى قولعاپ شەبەرلەرى بۇدان بۇرىن المان جەرىندە وتكەن ءبىرىنشى ماتچتا 3:2 ەسەبىمەن ۇتىپ قايتقان ەدى. سىرت الاڭدا وسىنداي باسىمدىق كورسەتكەن جەرلەستەرىمىز ءوز ءۇيىنىڭ تورىندە ءتىپتى قاتتى شايقاستى. ونداعى جەڭىستى جولدى 52 كيلوعا دەيىنگى سالماقتاعى ميراس جاقىپوۆ باستاپ بەردى. ول قارسىلاس كوماندا ساپىنداعى بەلگىلى شەبەر رونني بەبليكتى تالاسسىز ۇتتى – 3:0 (50:45, 50:45, 50:45). كەلەسى سالماقتاعى (60 كگ) سامات باشەنوۆ ارتۋر ءبريلدى 2:1 (50:45, 47:48, 50:45) قايتاردى. بۇدان سوڭ 69 كيلوداعى مەيىرىم نۇرسۇلتانوۆ ۆياچەسلاۆ كەربەردەن 3:0(50:45, 50:45, 49:46) دەگەن ەسەپپەن باسىم ءتۇستى. بۇل جەڭىس استانالىقتاردىڭ جارتىلاي فينالعا شىققانىن ايعاقتادى.
بىراق ءبىزدىڭ جىگىتتەر بۇدان كەيىن دە بوساڭسىعان جوق. الدىمەن 81 كيلوداعى حورۆات لەگيونەرى حرۆوە سەپ مەن سەرج ميشەل اراسىنداعى ايقاستا 3:0 (50:45, 50:45, 50:45) دەگەن ەسەپ تىركەلدى. ەڭ سوڭىنان 91 كيلوعا دەيىنگى سالماقتىڭ ساڭلاقتارى كۇش سىناستى. وندا قازاقستاندىق رۋسلان مىرساتاەۆ نەمىس ەريك پفايفەردى 2:1 (48:47, 49:46, 46:49) ەسەبىمەن ۇتتى. ءسويتىپ, بەس بوكسشىمىز دا ءوز مەرەيلەرىن ۇستەم ەتتى.
دامير قوجامقۇل.
دەرەككوز: Egemen.kz.
فوتو: Vesti.kz.