شىعىس قازاقستان وبلىسىنداعى ريددەر قالاسىندا «قازتسينك» كومپانياسىمەن ەنشىلەس «Altyn Tau-Vostok» جشس-ىنە قاراستى جەر استى كەنىشتەرى ءبىرىنىڭ بەتى وپىرىلىپ ءتۇسىپ كەتتى. بۇل تۋرالى Egemen.kz ءتىلشىسى حابارلادى.
ءساۋىردىڭ 4-ءى كۇنى ساعات 14:40-تا ريددەر شاھارىنىڭ ورتالىعىنان ءۇش شاقىرىم قاشىقتىقتا جەر استى كەنىشىنىڭ وپىرىلىپ قۇلاپ كەتۋى سالدارىنان مۇندا تەرەڭدىگى – 30, ديامەترى 70 مەتردى قۇرايتىن ۇلكەن قازانشۇڭقىر پايدا بولدى. وسىنىڭ سالدارىنان بۋراباي كوشەسىندەگى №5 جەكە ءۇي اتالعان قازانشۇڭقىرعا ءتۇسىپ كەتكەن. ءبىر جاقسىسى, ءۇش ادام ۇيدەن دەر ۋاقىتىندا شىعىپ ۇلگەرگەن.
ريددەر-سوكولنىي كەنىشىندە ورىن العان توتەنشە جاعدايعا بايلانىستى جۇمىس توقتاتىلىپ, 480 كەنشى جەر بەتىنە شىعارىلدى. ابىروي بولعاندا, وقيعا ورنىندا قايتىس بولعاندار مەن زارداپ شەككەندەر جوق. دەگەنمەن, 500 مەتر راديۋستا ورنالاسقان ۇيلەردىڭ بارلىعى قورشاۋعا الىنىپ, 173 تۇرعىن كوشىرىلدى. ونىڭ ىشىندە 60 ادام «قازتسينك» جشس ەمحاناسىنا جاتقىزىلىپ, قالعانى «سينەگورە» دەمالىس بازاسىنا ورنالاستىرىلدى. ولارعا ىستىق تاماق, مەديتسينالىق كەزەكشىلىك جانە پسيحولوگيالىق كومەك بەرۋ جۇمىستارىمەن اتالعان كاسىپورىن شۇعىلدانىپ جاتىر.
وبلىستىق توتەنشە جاعدايلار جونىندەگى دەپارتامەنت وكىلدەرىنىڭ مالىمەتى بويىنشا, قازانشۇڭقىر ەرنەۋىنىڭ ديامەترى سوڭعى ساعاتتاردا تاعى 5 مەترگە دەيىن كەڭەيگەن. وقيعا ورنىندا تاۋدا قۇتقارۋشىلار اسكەري جاساعى, قالالىق ىشكى ىستەر باسقارماسى, قالالىق سۋ ارناسى, جىلۋ-ەلەكتر ورتالىعى جانە تاعى باسقا قىزمەت وكىلدەرى جۇمىس ىستەۋدە. اتالعان شاحتانىڭ يەسى سانالاتىن «قازتسينك» كاسىپورنىنىڭ باسشىلىعى تۇرعىنداردىڭ بارلىق شىعىندارىن كوتەرىپ الۋعا, كەلەسى اپتادا ولارعا وتەماقى تولەۋگە ۋادە بەردى.
بۇگىن وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى ءۇيدىڭ قيراۋى مەن الىپ قازانشۇڭقىردىڭ پايدا بولۋىنا كەن كامەرالارىنىڭ بىرىندەگى شاتىردىڭ قۇلاۋى سەبەپ بولعانىن جەتكىزدى.
وقيعا ورنىندا وبلىستىق پروكۋراتۋرا قىزمەتكەرلەرى تەكسەرۋ جۇمىستارىن جۇرگىزۋدە. ونەركاسىپتىك قالاعا جاتاتىن ريددەردەگى جاعدايدى وبلىس باسشىلارى باقىلاۋعا الىپ, جەرگىلىكتى حالىققا قاجەتتى كومەكپەن قامتاماسىز ەتۋ جۇمىستارىن جالعاستىرۋدا. وقيعا ورنىندا وبلىستىڭ جەدەل شتابى قۇرىلىپ, وبلىس اكىمىنىڭ ورىنباسارى نۇرىمبەت ساقتاعانوۆ تابيعي اپاتتىڭ سالدارىن جويۋ جانە ءارى قارايعى ءىس-ارەكەت جوسپارىن انىقتاۋ ماقساتىندا جەدەل جيىن وتكىزدى. جەر بەتىنىڭ تاعى دا وپىرىلىپ تۇسۋىنەن ساقتانۋ شارالارى قولعا الىندى.
ايتا كەتەيىك, سوڭعى كۇندەرى ءوڭىردىڭ توتەنشە جاعداي قىزمەتكەرلەرىنە وڭاي سوقپاي تۇر. وسىدان ەكى كۇن بۇرىن جارما اۋدانىندا ءبىر تاۋلىك ىشىندە 10 مىڭ گەكتار اۋماققا جايىلعان ءورت سوندىرىلگەن بولاتىن. بىرلىك اۋىلدىق وكرۋگىندا اۋىزدىقتالعان ءورتتى ءسوندىرۋ جۇمىستارىنا 126 ءورت ءسوندىرۋ قىزمەتكەرى, 17 تەحنيكا, جەرگىلىكتى 60 تۇرعىن, ءتىپتى «تەمىر جولى» مەكەمەسىنىڭ ءورت ءسوندىرۋ پويىزى دا قاتىستى.
دۋمان اناش.
شىعىس قازاقستان وبلىسى.