تاسقىنعا توسقىن

دالاداعى جانە باياناۋىل تاۋلارىنداعى قار ەرىپ, جەر دە قۇرعاي باستاعان كەزدە, 1 ساۋىرگە قاراعان ءتۇنى قارااششى اۋىلىنا قاراعاندى وبلىسى جاعىنان تاسقىن سۋ كەلدى. كورشى وبلىس اۋماعىندا اقجار جانە قاراتوعا دەگەن ەكى سۋ بوگەتى بار كورىنەدى. قاراتوعا سۋ بوگەتىنىڭ 6 سۋ وتكىزۋ قۇرالعىسى اشىق, سودان اقجار سۋ بوگەتىنە سۋ جينالعان. مىنە, وسى ەكى سۋ بوگەتتەرىنەن اققان تاسقىن سۋ قارااششى اۋىلىنا قاۋىپ ءتوندىرىپتى. الدىن الا دايىندالعان جۇمىس بارىسىندا اۋىل ازاماتتارى بار, وبلىستىق توتەنشە جاعدايلار دەپارتامەنتىنىڭ جەكە قۇرامى, ارنايى تەحنيكالار دا دەر كەزىندە ۇلگەردى. ساقتىقتا قورلىق جوق دەگەن وسى. تاس­قىنعا توسقىن قويىلدى. اۋىل ىرگەسىندەگى سۋ قويماسى بەكىتىلدى. تاس, قيىرشىق تاس ارالاس قۇم توسەلدى. توپىراق تولتىرىلعان 400 قاپ ينەرتتى ماتەريالدار قورى ازىرلەندى. سونىمەن قاتار, قارااششىدا توتەنشە جاعدايلار جونىندەگى شتاب قۇرىلدى. كەزەكشىلىك جۇمىس جاساۋدا. اۋىل امان-ەسەن. باياناۋىل اۋدانىنىڭ اكى­مى ەرنۇر ايتكەنوۆتىڭ ءمالىم­دەۋىن­شە, قازىر قارااششى اۋىلىن سۋ باسۋ قاۋپى جوق. قا­رااششى وزەنىنىڭ ارناسىنان شىققان سۋ تەڭدىك اۋىلى ماڭىنداعى القاپتاردى تولتىرۋدا. ودان ءارى تاسقىن سۋ اششىسۋ دەگەن وزەنگە قۇيادى. ال, الدىڭعى جىلدارى كوكتەمگى سۋ تاسقىنى سالدارىنان توتەنشە جاعدايلار ورىن العان اقتوعاي اۋدانىنىڭ شولاقسور اۋىلى اۋماعى دا توتەنشە جاعدايلار دەپارتامەنتىنىڭ باقىلاۋىندا. سونىمەن قاتار, قانىش ساتباەۆ اتىنداعى ارنا بويى دا تەكسەرىلۋدە. وبلىس اكىمىنىڭ ءبىرىنشى ورىنباسارى دۇيسەنباي تۇرعانوۆتىڭ باسشىلىعىمەن جەدەل توپ اقتوعاي اۋدانى شولاقسور اۋىلىندا ءجۇر. ويتكەنى, سىلەتى سۋ قويماسىنان اعىنى كۇشتى تاسقىن سۋ جىبەرىلگەن. سۋ قويماسىن سۋ شايىپ كەتۋ قاۋپى بار جەرلەرى بەكىتىلدى. توتەنشە جاعدايلار دەپارتامەنتىنىڭ 10 بىرلىك ارنايى تەحنيكاسى مەن 35 ادامنان قۇرالعان جەكە قۇرامى شولاقسور اۋىلىندا. جەكە قۇرام مەك­تەپ­تە جۇمىس جاساۋدا, كوماندالىق-شتاب­تىق ماشينا جۇمىسقا دايىن. سۋ اعىنى مەن ساعاسىن باقىلايتىن كەزەكشى بەكەتتەر ۇيىمداستىرىلعان. 2 ءساۋىر كۇنگى جاعداي بويىنشا سۋدىڭ كەلۋى بايقالمادى. اۋىل تۇرعىندارى مەكتەپ پەن مادەنيەت ۇيىندە اشىل­عان ەۆاكۋاتسيالىق پۋنك­ت­تە. تۇرعىنداردىڭ مالى اۋدان­نىڭ قىرىقۇي اۋىلى جانىنداعى قاۋىپسىز جەرگە جىبەرىلدى. تاسقىن سۋ قاۋ­پى­نىڭ الدىن الۋ بويىنشا جۇمىستاردى توتەنشە جاعدايلار جونىندەگى دەپارتامەنت باستىعى, پولكوۆنيك مۇرات ايتجانوۆ باسقارۋدا. وڭىردەگى كوكتەمگى سۋ تاسقىنى جاعدايى وبلىس اكىمى قانات بوزىمباەۆتىڭ جەكە باقىلاۋىندا تۇر. فاريدا بىقاي, «ەگەمەن قازاقستان». پاۆلودار وبلىسى.