پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ توراعاسى اقان بيجانوۆ پەن كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى سەرىك اقىلباي بۇۇ-نىڭ ءدىني نانىم-سەنىم بوستاندىعى جونىندەگى ارناۋلى بايانداماشىسى حاينەر بيلەفەلدتپەن كەزدەستى, دەپ حابارلادى سەناتتىڭ ءباسپاسوز قىزمەتى.
كەزدەسۋ بارىسىندا قازاقستاننىڭ ءدىن سالاسىنداعى زاڭنامالىق بازاسىنىڭ جاعدايى مەن دامۋى, 2011 جىلعى 11 قازانداعى «ءدىني قىزمەت جانە ءدىني بىرلەستىكتەر تۋرالى» جاڭا زاڭدى ىسكە اسىرۋدىڭ ماسەلەلەرى, سونداي-اق, ءدىني بىرلەستىكتەردىڭ قىزمەتى تۋرالى پىكىر الماسىلدى.
ا.بيجانوۆ ءوز سوزىندە تاۋەلسىزدىك العاننان بەرى قازاقستاندا ادام قۇقىقتارى مەن بوستاندىعى تۇرعىسىندا, دىنگە قۇرمەتپەن قارايتىن دەموكراتيالىق مەملەكەتتىك ساياسات جۇرگىزىلىپ كەلە جاتقانىن اتاپ ءوتتى. ءدىني سەنىمىنە قاراماستان, ازاماتتاردىڭ بوستاندىعى, مەملەكەت پەن ءدىننىڭ ءبىر-ءبىرىنىڭ ىسىنە ارالاسپاۋ قاعيداسى بەكىتىلگەن كونستيتۋتسيا مەملەكەتتىك ساياساتتىڭ نەگىزى بولىپ تابىلادى.
سەناتور, سونداي-اق, مۇسىلمانداردىڭ قۇربان ايت مەرەكەسىنىڭ العاشقى كۇنى مەن پراۆوسلاۆيەلىكتەردىڭ روجدەستۆو مەرەكەسىن دەمالىس دەپ جاريالاۋ تۋرالى قازاقستان پرەزيدەنتىنىڭ جارلىعى مەملەكەتتىڭ دىنگە دەگەن قۇرمەتىنىڭ كورىنىسى بولىپ تابىلاتىنىن اتاپ ءوتتى.
ءوز كەزەگىندە س.اقىلباي «ءدىني قىزمەت جانە ءدىني بىرلەستىكتەر تۋرالى» زاڭدى ىسكە اسىرۋ مەن ەلىمىزدەگى ءدىني قىزمەتتى قۇقىقتىق رەتتەۋ ماسەلەلەرىنە ەگجەي-تەگجەيلى توقتالدى.
حاينەر بيلەفەلدت سەناتورلاردى قازاقستانعا ساپارىنىڭ بارىسى مەن ەلىمىزدەگى مەملەكەتتىك ورگانداردىڭ, مەملەكەتتىك ەمەس ۇيىمداردىڭ وكىلدەرىمەن كەزدەسۋلەرى, الماتى, استانا جانە قاراعاندى وبلىستارىندا بولعانى تۋرالى حاباردار ەتتى. «كەزدەسكەن ادامداردىڭ ءبارى قازاقستاندا ءدىن سالاسىندا تولەرانتتى احۋال مەن ۇيلەسىم قالىپتاسقانىن ايتتى. بۇل مەنىڭ باياندامامدا جاريا ەتىلەتىن بولادى», دەدى ح.بيلەفەلدت.
جۇزدەسۋ بارىسىندا اڭگىمەلەسۋشىلەر قازاقستانداعى ءدىن سالاسىنداعى زاڭناما تۇتاستاي العاندا حالىقارالىق ەرەجەلەر مەن ستاندارتتارعا سايكەس كەلەتىنىن اتاپ ءوتىپ, وسى سالاداعى زاڭنامانى جەتىلدىرۋ جولدارى تۋرالى پىكىر الماستى.