اگرارلىق سەكتورداعى ەڭ تومەنگى جالاقى الاتىن مامانداردىڭ ءبىرى - ۆەتەرينارلار. قر اۋىل شارۋاشىلىعى ءمينيسترى ەربول قاراشوكەەۆ مال دارىگەرلەرىنىڭ جالاقىسى قانشالىقتى وسەتىنىن ايتىپ بەردى, دەپ حابارلايدى Egemen.kz.
«ۆەتەرينارلاردىڭ جالاقىسى تومەن, ال ولاردىڭ جۇمىسى وتە قاۋىپتى جانە ولار ۇنەمى ۇيدەن تىس جەردە, ساپارلاردا بولادى. رەسپۋبليكا بويىنشا مال دارىگەرلەرىنىڭ ورتاشا جاسى 40-55 جاستى قۇرايدى. وكىنىشكە قاراي, جاستار ۆەتەرينارلاردىڭ وقۋىن وقىعىسى كەلمەيدى. سەبەبى ولاردىڭ جالاقىلارى تومەن, ال جۇمىستىڭ كولەمى ۇلكەن», دەدى ەربول قاراشوكەەۆ ماجىلىستەگى ۇكىمەت ساعاتى كەزىندە.
ونىڭ ايتۋىنشا, ۇكىمەت بۇل ماسەلەنى جان-جاقتى سارالاعان.
«ۆەتەرينارلىق سەكتوردا جوعارى بىلىكتى جاس ماماندار جەتىسپەيدى. قازىرگى زامانعى قوعامنىڭ ۇردىستەرىمەن تەڭ تابىس تابۋ مۇمكىندىگىنىڭ بولماۋى, ەڭبەكتىڭ قيىن جاعدايلارى, اۋىلدىق جەرلەردە ينفراقۇرىلىمنىڭ دامىماۋى جاستار اراسىندا مال دارىگەرى كاسىبىنىڭ تارتىمسىزدىعىنا الىپ كەلدى. وسى جىلدىڭ 1 ساۋىرىنە رەسپۋبليكا بويىنشا مەملەكەتتىك تاپسىرىستى ورىنداۋ ءۇشىن تاريفتەردى كوتەرۋ ەسەبىنەن ۆەتەرينارلىق مامانداردىڭ جالاقىسى ورتا ەسەپپەن 33,4%-عا ارتتىرىلدى. جىل سوڭىنا دەيىن 60%-عا دەيىن ارتتىرۋ جوسپارلانعان», دەدى مينيستر.
ول كەلەسى مىسالداردى كەلتىردى.
«قازىرگى ۋاقىتتا كوممۋنالدىق كاسىپورىندارداعى ورتاشا ايلىق جالاقى وڭىرلەرگە بايلانىستى قىزىلوردا وبلىسىندا 80 مىڭنان پاۆلودار وبلىسىندا 200 مىڭعا دەيىن وزگەرەدى. الايدا, بۇل ءالى دە جەتكىلىكسىز», دەپ اتاپ ءوتتى اشم باسشىسى.
بۇل ماسەلەنى شەشۋ ءۇشىن جەرگىلىكتى جەرلەردە كەلەسى شارالار قابىلدانادى: باسەكەلەستىك سەكتورى جوق جەرلەردە كوممۋنالدىق ۆەتەريناريالىق كاسىپورىندار كورسەتەتىن اقىلى قىزمەت تۇرلەرىنىڭ كولەمىن ۇلعايتۋ. ول ءۇشىن بارلىق جەردە اقىلى قىزمەت تۇرلەرىنە تاريفتەر بەكىتىلەدى.
ء«تيىستى زاڭداردىڭ قابىلدانۋىمەن كەلەسى جىلدان باستاپ قمۋ بويىنشا 50% قوسىمشا تولەمدى جانە كمك مەن قمۋ بويىنشا بازالىق لاۋازىمدىق جالاقىعا 140% قوسىمشا تولەمدى جۇزەگە اسىرۋ كوزدەلەتىنىن ءبارىمىز بىلەمىز. سونداي-اق ساۋىقتىرۋعا ارنالعان جاردەماقى رەتىندە ەكى لاۋازىمدىق ايلىق تولەۋ ەنگىزىلەدى. ءبىز بۇل شارالار ماماندىقتىڭ تارتىمدىلىعى مەن بەدەلىن ايتارلىقتاي ارتتىرۋعا مۇمكىندىك بەرەدى دەپ ەسەپتەيمىز», دەپ تۇيىندەدى ە.قاراشوكەەۆ.