تەڭىز كەن ورنىندا 7 مىڭ جۇمىسشى وزگە جوبالارعا جۇمىسقا الىنادى, دەپ حابارلايدى Egemen.kz
بۇگىن بۇل تۋرالى وبلىس اكىمى ماحامبەت دوسمۇحامبەتوۆتىڭ توراعالىعىمەن وتكەن جيىندا بەلگىلى بولدى. الەۋمەتتىك ارىپتەستىك پەن الەۋمەتتىك جانە ەڭبەك قاتىناستارىن رەتتەۋ جونىندەگى وبلىستىق ءۇش جاقتى كوميسسيا وتىرىسىندا «تەڭىزشەۆرويل» جشس-ءنىڭ مەردىگەر كومپانيالارىنان قىزمەتكەرلەردىڭ بوساتىلۋى جانە ولاردى جۇمىسقا ورنالاستىرۋ, سونداي-اق, ەڭبەك ۇجىمدارى اراسىنداعى ەڭبەك داۋلارىن بولدىرماۋ مەن ەڭبەك قاتىناستارىنىڭ جاعدايى جونىندەگى ماسەلەلەر قارالدى.
«تەڭىزشەۆرويل» جشس-ءنىڭ ۇكىمەتپەن جانە جۇرتشىلىقپەن بايلانىس ءبولىمىنىڭ باس مەنەدجەرى ريزابەك ارتىعاليەۆتىڭ ايتۋىنشا, كەلەشەك كەڭەيۋ جوباسىنىڭ اياقتالۋىنا بايلانىستى جىل سوڭىنا دەيىن بوساتىلاتىن جۇمىسشىلاردىڭ 7 مىڭنان استامىن كومپانيا وزىندەگى وزگە جوبالارعا جۇمىسقا الۋدى قاراستىرىپ وتىر.
وبلىستىق مەملەكەتتىك ەڭبەك ينسپەكتسياسى باسقارماسىنىڭ باسشىسى يگىلىك اۋباكىروۆتىڭ مالىمەتىنشە بىلتىرعى اقپانىنان بۇگىنگە دەيىن ەڭبەك تاۋەكەلدىگىندە 56 مەكەمە بولعان. ونىڭ ىشىندە 49 كومپانياداعى ەڭبەك داۋلارى شەشىمىن تاپقان. قازىر 52 جۇمىسشىنىڭ الدىنداعى 8 ملن تەڭگە بەرەشەگى بار 3 مەكەمەمەن جۇمىستار جۇرگىزىلىپ جاتىر.
«كەلەشەك كەڭەيۋ جوباسىنان جىل سوڭىنا دەيىن بوساتىلاتىن جۇمىسشىلاردان باسقا جۇمىسقا اۋىستىرىلاتىنداردىڭ ءتىزىمىن اكىمدىككە ۋاقىتىلى ۇسىنۋ كەرەك. جوبادان بوساتىلاتىن جۇمىسشىلاردىڭ اتى-ءجونى, قۇجاتى, ماماندىعى, مەكەن-جايى, بايلانىس ءنومىرى كورسەتىلگەن ءتىزىمىن ءبىر اي بۇرىن, ال ناقتى بوساتىلعان جۇمىسشىلاردىڭ ءتىزىمىن ءار ايدىڭ باسىندا بەرىلگەنى ءجون. الداعى ايلاردا بوساتىلاتىن جۇمىسشىلاردى مەردىگەرلىك مەكەمەلەرگە جۇمىسقا ورنالاسۋىنا ىقپال ەتىڭىزدەر. جۇمىسقا ورنالاستىرۋ كەزىندە جەرگىلىكتى تۇرعىندارعا باسىمدىق بەرۋ جاعىن دا ويلاستىرۋ كەرەك. مەردىگەر, قوسالقى مەردىگەر كومپانيالاردا جالاقى تولەمەۋگە جول بەرمەۋدى, زاڭ بۇزۋشىلىقتاردى بولدىرماۋدى قاتاڭ باقىلاۋدا ۇستاپ, جۇمىسشىلار اراسىندا نارازىلىق تۋدىرماۋ ءۇشىن ناقتى ءىس-شارالاردى قولعا الۋ قاجەت», دەدى ماحامبەت دوسمۇحامبەتوۆ.