قوستانايداعى №28 مەكتەپ-گيمنازيادا وتكەن «بالا بارىسى» وبلىستىق ءتۋرنيرى وڭىردە تۇڭعىش رەت ۇيىمداستىرىلىپ وتىر. ۇلت ۇستازى احمەت بايتۇرسىن ۇلىنىڭ 150 جىلدىعى مەن بالالار جىلىنا ارنالعان بەلدەسۋگە بۇعان دەيىنگى ىرىكتەۋ كەزەڭدەرىندە جەڭىمپاز اتانعان ارقالىق, ليساكوۆ, قوستاناي قالاسى, قوستاناي جانە فەدوروۆ اۋداندارىنان كەلگەن 25 جاس بالۋان كۇش سىناستى.
«بالا بارىسى» وبلىستىق ءتۋرنيرىنىڭ اشىلۋ راسىمىندە بالالار مەن جاسوسپىرىمدەردىڭ ۇلتتىق سپورت مەكتەبىنىڭ باسشىسى ايبات قاباجاەۆ جاس بالۋاندارعا ساتتىلىك تىلەپ, وڭىردە قازاق كۇرەسىن دامىتۋعا ۇلەس قوسىپ جۇرگەن سپورت ارداگەرلەرىنە العىس ايتتى.
جاس سپورتشىلاردى قۇتتىقتاعان قالالىق ءبىلىم ءبولىمىنىڭ باسشىسى گۇلسىم ورازباەۆا بۇگىندە مەكتەپ قابىرعاسىندا ءبىلىم الىپ جۇرگەن جاسوسپىرىمدەردىڭ ۇلتتىق سپورتقا, اسىرەسە قازاق كۇرەسىنە دەگەن قىزىعۋشىلىعى مول ەكەنىن اتاپ ءوتىپ, مۇنداي سپورت جارىستارىنىڭ وسكەلەڭ ۇرپاقتى تاربيەلەۋدەگى ونەگە-تاعىلىمى ايرىقشا ەكەندىگىنە توقتالدى.
– جالپى, قوستاناي جەرى كوپتەگەن ۇلت قايراتكەرىن دۇنيەگە كەلتىرگەن كيەلى مەكەن. كەشەگى الاش ارىستارى وسى ەلدىڭ جارقىن بولاشاعى ءۇشىن, بۇگىنگى جاستار ءۇشىن قىزمەت ەتتى. سپورت پەن ءبىلىم ەگىز. وسى قاعيدانى جادىنا ءتۇيىپ وسكەن جاس جاقسى ازامات بولىپ قالىپتاسادى. بيىل مەملەكەت باسشىسى قاسىم-جومارت توقاەۆ 2022 جىلدى بالالار جىلى دەپ جاريالاعانىن بىلەسىزدەر. پرەزيدەنت بالالاردىڭ قۇقىقتارىن قورعاپ, دارىندى بالالاردى قولداۋ كەرەكتىگىن ەرەكشە اتاپ وتكەن بولاتىن. ونەگەلى ءبىلىم, ۇلگىلى تاربيە الۋ سىزدەردىڭ باستى مىندەتتەرىڭىز. بيىل, مىنە «رۋحاني جاڭعىرۋ» باعدارلاماسىنا دا بەس جىل تولادى. ۇلتتىق سپورتىمىزدى ناسيحاتتاۋ وسى رۋحاني جاڭعىرۋدان باستالادى. بۇگىن بوز كىلەمگە شىعىپ باعىن سىنايتىن جاس بالۋانداردىڭ بارىنە ساتتىلىك سەرىك بولسىن! – دەدى ءبىلىم ءبولىمىنىڭ باسشىسى.
«بالا بارىسىنان» ۇمىتكەر ورەندەردىڭ قاي-قايسىسى دا وسال ەمەس. بۇعان دەيىن اۋداندىق, وبلىستىق تۋرنيرلەردە ىسىلىپ, ۇزدىكتەر قاتارىنان كورىنىپ جۇرگەن كىل مىقتىلار. جارىس قورىتىندىسى بويىنشا جۇلدەلى ورىننىڭ ءبارىن قوستاناي اۋدانىنىڭ جاس بالۋاندارى ۇتىپ الدى. III ورىندى داۋلەت مۇحابەتقالي ەنشىلەسە, II ورىن نۇرجان امانباەۆقا بۇيىردى. ال قارسىلاس شاق كەلتىرمەگەن ەرلان ايدوس قوستاناي وبلىسىنىڭ «بالا بارىسى» اتاعىن جەڭىپ الدى.
– ءتورت جىل قاتارىنان تىنباي جاتتىعىپ كەلەدى. شاكىرتىمنىڭ بولاشاعىنان زور ءۇمىت كۇتەمىن. الدا شىمكەنتتە وتەتىن رەسپۋبليكالىق چەمپيوناتقا جولداما الدى, سوندا باعىن سىنايتىن بولادى, – دەيدى ايدوستىڭ باپكەرى س.دارمەنباەۆ.
قوستاناي