2022 جىلدىڭ 1 ناۋرىزداعى جاعداي بويىنشا, مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلعان جاعدايدا تولەنەتىن الەۋمەتتىك تولەمدەردى 25,2 مىڭ ادام الادى, بۇل رەتتە 18,5 مىڭ قازاقستاندىققا تولەم وسى جىلى العاش رەت تاعايىندالدى, دەپ حابارلايدى Egemen.kz.
ەڭبەك مينيسترلىگىندە حابارلاعانداي, جۇمىستان بوساتىلعان قىزمەتكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى ءبىر ايدان التى ايعا دەيىن جۇمىسىنان ايرىلۋى بويىنشا الەۋمەتتىك تولەمدەر الادى.
تولەم جوعالعان تابىستىڭ 40%-نا دەيىنگى مولشەردە ماسق قاراجاتى ەسەبىنەن جۇزەگە اسىرىلادى.
جۇمىستان بوساتىلعان قىزمەتكەرگە تولەم تاعايىنداۋ ءۇشىن:
egov.kz پورتالىندا تىركەلۋ كەرەك; «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەپ جۇرگەن ادامداردى تىركەۋ» قىزمەتىن تاڭداۋ; بارلىق سۇراقتارعا جاۋاپ بەرىپ, قىزمەتكە ونلاين تاپسىرىس بەرۋ جانە ەتسق-مەن قول قويۋ ارقىلى ءوتىنىمدى جىبەرۋ; ءبىر كۇن ىشىندە ءوتىنىش بەرۋشىنىڭ تۇرعىلىقتى جەرى بويىنشا جۇمىسپەن قامتۋ ورتالىعى بوس جۇمىس ورىندارىن ۇسىنادى; ەگەر جۇمىس تابىلماسا, ءۇش جۇمىس كۇنى ىشىندە قاشىقتىقتان جۇمىسسىز مارتەبەسى بەرىلەدى (قاجەت بولعان جاعدايدا قوسىمشا اقپارات جيناۋ ءۇشىن ءوتىنىش بەرۋشىمەن حجقو قىزمەتكەرى حابارلاسادى).بۇل قىزمەتتى ونلاين-رەجيمدە ەلەكتروندىق ەڭبەك بيرجاسى ارقىلى دا الۋعا بولادى (enbek.kz).
جۇمىسسىز رەتىندە تىركەلگەنى تۋرالى دەرەكتەر بولعان كەزدە ەڭبەكمينىنىڭ اقپاراتتىق جۇيەسى پرواكتيۆتى فورماتتا ماسق-دان تولەم تاعايىنداۋ بويىنشا قىزمەت كورسەتۋگە كەلىسىم بەرۋ ءۇشىن ۇيالى تەلەفونعا SMS-حابارلاما جىبەرەدى. كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.
ەڭبەك مينيسترلىگىندە اتاپ وتكەندەي, ماسق قاراجاتى ەسەبىنەن جۇمىسىنان ايىرىلعان جاعدايدا تولەنەتىن الەۋمەتتىك تولەم جۇمىستان شىعۋ سەبەپتەرىنە قاراماستان جۇزەگە اسىرىلادى جانە جۇمىسسىز ادام جۇمىس ىزدەپ جۇرگەن كەزەڭدە ونى قولداۋعا ارنالعان.