فرانتسيانىڭ مونپەلە قالاسىندا مانەرلەپ سىرعاناۋدان الەم چەمپيوناتى ءوز مارەسىنە جەتتى. «زيۋد دە فرانس» كەشەنىندە وتكەن بايراقتى باسەكەدە ادەتتەگىدەي ءتورت جۇلدە جيىنتىعى ساراپقا سالىندى. بۇل جارىستا قازاقستاننىڭ نامىسىن جەكەلەگەن سايىستا ميحايل شايدورين جانە سپورتتىق بيدەن گاۋھار ناۋرىزوۆا مەن بويسانگۋر داتيەۆ جۇبى قورعاۋى ءتيىس ەدى. بىراق شايدورين ۆيزا الا الماي ەلدە قالىپ قويدى. ءسويتىپ, بارشا قازاق جانكۇيەرلەرى بيشىلەرىمىزدىڭ جولىنا ۇلكەن ۇمىتپەن قارادى.
اتالعان جۇپ قازاقستان چەمپيوناتىندا ءۇش مارتە توپ جارعانىمەن, حالىقارالىق ارەنادا اۋىز تولتىرىپ ايتارلىقتاي تابىستارعا قول جەتكىزە العان جوق. 2018 جىلى گاۋھار ناۋرىزوۆا مەن بويسانگۋر داتيەۆ سوفيادا وتكەن جاستار اراسىنداعى الەم بىرىنشىلىگىنە قاتىسىپ, 27-ورىندى قاناعات تۇتتى. 2017 جىلى براتيسلاۆا گران-پريىندە بەسىنشى جانە 2019 جىلى Christmas Cup تۋرنيرىندە ءتورتىنشى ساتىعا تابان تىرەدى. ەرەسەكتەر دۋىنا قوسىلعاننان كەيىن بۋداپەشت پەن الماتىدا ۇيىمداستىرىلعان ەكى بىردەي حالىقارالىق جارىستا ۇزدىك سەگىزدىكتىڭ ساناتىنان كورىندى. مىنە, جەرلەستەرىمىزدىڭ بارلىق تابىسى وسى عانا. ال مونپەلەدە كىلەڭ مىقتىلاردىڭ جينالعانىن ەسكەرسەك, دۋالى اۋىز ماماندار ولاردىڭ ۇزدىكتەر قاتارىنا قوسىلا المايتىنىن الدىن الا جورامالداعان ەدى. ايتقانداي-اق, قىسقا باعدارلامادا قورىتىندىسى بويىنشا گاۋھار مەن بويسانگۋر سوڭعى ورىندا قالىپ قويىپ, جارىستىڭ فينالدىق بولىگىنە شىعا المادى.
ەرلەر اراسىنداعى باس جۇلدە ءۇشىن تارتىس جاپون جىگىتتەرى اراسىندا ءوربىدى. قىسقا باعدارلامادا العاشقى ءۇش ورىندى دا سولار يەلەندى. ءۇش دۇركىن وليمپيا ويىندارىنىڭ جانە ەكى دۇركىن الەم چەمپيوناتىنىڭ كۇمىس جۇلدەگەرى سەما ۋنو كوش باستاسا, توكيو وليمپياداسىنىڭ ۆيتسە-چەمپيونى يۋما كاگياما ەكىنشى ساتىعا جايعاستى. ءۇشىنشى ورىنعا بۇعان دەيىن كوپشىلىكتىڭ كوزىنە تۇسپەگەن تومونو كادزۋكي تابان تىرەدى. ەركىن باعدارلامادا العاشقى ەكەۋى ءوز ورىندارىن ساقتاپ قالدى. ناتيجەسىندە, 312,48 ۇپاي جيعان ۋنو باس جۇلدەنى ولجالاسا, 297,60 ۇپايدى ەنشىلەگەن كاگياما كۇمىسكە قول سوزدى. ال كادزۋكيدى جىلى ورنىنان ىسىرعان امەريكالىق ۆينسەنت چجوۋ وسىدان ءۇش جىل بۇرىنعى سايتاماداعى كورسەتكىشىن قايتالاپ, قولا مەدالدى يەلەندى. ونىڭ ەنشىسىندە – 277,30 ۇپاي.
ايەلدەر باسەكەسىنىڭ باس جۇلدەسى دە جاپونيانىڭ مانەرلەپ سىرعاناۋشىلارىنا بۇيىردى. 21 جاستاعى بەيجىڭ وليمپياداسىنىڭ قولا جۇلدەگەرى كاوري ساكوموتو 236,09 ۇپايمەن التىننان القا تاقتى. كۇمىس مەدالدى لۋنا حەندريكس موينىنا ءىلدى. ازىرگە بۇل – 22 جاستاعى بەلگيالىق بۇرىمدىنىڭ سپورتتىق مانسابىنداعى ەڭ زور تابىسى. ول 217,70 ۇپاي جينادى. قولا مەدالدى اليسا ليۋ ەنشىلەدى. 16 جاستاعى امەريكالىق بويجەتكەن 211,19 ۇپايدى قورجىنعا سالدى.
سپورتتىق جۇپتاردىڭ سايىسىندا الەكسا كنيريم مەن برەندون فرەيزەر الدارىنا جان سالمادى. كوماندالىق باسەكەدە وليمپيا ويىندارىندا ەكى مارتە جۇلدە الىپ, 2015 جىلعى الەم چەمپيونى جانە 2021 جىلعى دۇنيەجۇزىلىك دودانىڭ كۇمىس جۇلدەگەرى دەگەن اتاعى بار امەريكالىق سپورتشىلار بۇل جولى ەشكىمگە دەس بەرمەدى. جاپونيالىق ريكۋ ميۋرا مەن ريۋيتي كيحارا كۇمىسپەن كۇپتەلسە, كانادالىق ۆانەسسا دجەيمس پەن ەريك رەدفورد قولاعا قول سوزدى.
ەستەرىڭىزگە سالا كەتەيىك, باستى فاۆوريتتەردىڭ ءبىرى ءارى بىرەگەيى سانالعان رەسەي قۇراماسى ۋكرايناداعى جاعدايعا بايلانىستى مونپەلەدەگى جارىستان شەتتەتىلدى. ءدال سونداي جازا بەلارۋس كومانداسىنا دا قولدانىلدى.