ەلىمىزدىڭ كوتەرمە جانە بولشەك ساۋدا سالاسىندا تۇراقتى ءوسىم بايقالادى. 2021 جىلدىڭ قورىتىندىسى بويىنشا كوتەرمە-بولشەك ساۋدانىڭ جالپى كولەمى 42,2 ترلن تەڭگەنى, ياعني 100 ملرد دوللاردى قۇراعان.
بۇل تۋرالى QazTrade اق باس ديرەكتورى ازامات اسقار ۇلى تاشكەنتتە وتكەن حالىقارالىق ينۆەستيتسيالىق فورۋم اياسىندا ايتتى, دەپ حابارلايدى ساۋدا جانە ينتەگراتسيا مينيسترلىگىنىڭ رەسمي سايتى.
ازامات اسقار ۇلىنىڭ ايتۋىنا قاراعاندا, كوتەرمە-بولشەك ساۋدا كولەمى پاندەمياعا دەيىنگى كەزەڭدە جىلىنا 7,6%-عا وسكەن. 2020 جىلى قاتاڭ كارانتين اياسىندا سالادا 7,2%-عا قۇلدىراۋ بايقالعان. بىراق بىلتىر ءوسىم قايتادان 9,2%-دى قۇراپتى. «بيىل دا ءوسىم جالعاسىپ كەلەدى. 2022 جىلدىڭ العاشقى ەكى ايىندا ونىڭ كولەمى 6,1%-عا جەتتى, بىراق بولشەك سەگمەنتتە 7,5%-عا تومەندەۋ بايقالدى», دەدى ول.
مينيسترلىكتىڭ ءباسپاسوز قىزمەتىنىڭ حابارلاۋىنشا, پاندەميا ەلەكتروندى كوممەرتسيانى دامىتۋدىڭ درايۆەرىنە اينالعان. وتكەن جىلى قازاقستاندا تولەم كارتوچكالارىن پايدالانۋ ارقىلى جاسالاتىن ترانزاكتسيالار كولەمى 220 ملرد دوللاردان اسقان. وسىلايشا, 2014 جىلدان بەرى قازاقستاندا ەلەكتروندى ساۋدا كولەمى 10 ەسەگە ارتىپتى. ەندى ماماندار 2025 جىلعا قاراي ەل ريتەيلىنىڭ جالپى كولەمىندەگى ە-كوممەرتسيا ۇلەسىن 15%-عا دەيىن جەتكىزۋدى ماقسات ەتىپ وتىر. وتكەن جىلدىڭ 9 ايىندا ونىڭ ۇلەسى شامامەن 11%-دى قۇراعان.
بۇگىنگى تاڭدا قازاقستاندا 100-دەن استام ينتەرنەت-دۇكەن مەن 20 جەرگىلىكتى جانە حالىقارالىق ماركەتپلەيستەر جۇمىس ىستەيدى. ەڭ ءىرى قازاقستاندىق ونلاين-الاڭى – Kaspi.kz. ونىڭ اينالىمى ورتا ەسەپپەن 1 ملرد دوللاردى قۇرايدى. ەندى Arbuz.kz ونلاين-سۋپەرماركەتى دە حالىقارالىق دەڭگەيگە شىعۋدى جوسپارلاپ وتىر. بۇدان بولەك, ەلىمىزدەگى ءىرى ماركەتپلەيستەرىنىڭ ءبىرى Flip.kz جانە Satu.kz الاڭدارىن اي سايىن 5 ميلليوننان استام ادام پايدالانادى ەكەن.