وسكەمەندە ورمەكشىلەر كورمەسى ءوتتى. ادەتتە بۋىناياقتىلاردىڭ قيمىل-قوزعالىسىنا ءمان بەرە بەرمەيدى ەكەنبىز, سويتسەك ءار قوزعالىسىنان الدەنەنى اڭعارۋعا بولادى ەكەن. ونى كورەرمەندەرگە اراحانولوگيا, ياعني ورمەكشىلەردى زەرتتەيتىن مامان كورسەتىپ, ايتىپ بەردى.
كورمەگە قازاقستان اۋماعىندا كەزدەسە بەرمەيتىن ۋلى ورمەكشىلەر قويىلدى. اۋىلدىق جەردە باۋ-باقشالاردا جۇرەتىن بۇيىلەردەن بولەكتەۋ. قىزىلدى-جاسىلى, ۇلكەندى-كىشىسى بار. شىنى جاشىكتەردىڭ ىشىندە تۇرسا دا, جىلتىراعان كوزدەرىنە, جىبىرلاعان بۋىندى اياقتارىنا, تۇكتى ارقاسىنا قاراپ, تىكسىنىپ, تىتىركەنىپ قالاسىڭ. ۋلى بولعانىمەن, ادامدى الباتى شاقپايدى. وزىنە تونگەن قاۋىپتى سەزگەندە عانا شابۋىلعا كوشەدى ەكەن. كوزدەرى كوپ بولعانىمەن, بۇل جاندىكتەردىڭ كورۋى ناشار, ەستۋ قابىلەتتەرى دە جوق. ماڭايىن داۋىستىڭ تولقىندارى ارقىلى عانا سەزەدى.
اراحانولوگيا مامانى, كورمەنى ۇيىمداستىرۋشى رۇستەم ەسەن كورەرمەندەرگە ورمەكشىنىڭ وزدىكتەرىنەن شاقپايتىنىن تاجىريبە جۇزىندە كورسەتىپ, كوزدەرىن جەتكىزدى. الدىمەن ورمەكشىنىڭ تۇكتى ارقاسىن سيپاپ كوردى. وندايدا ورمەكشى زۋ ەتىپ قاشا جونەلدى. سودان سوڭ قولىنداعى زاتتى سەرمەپ ەدى, ورمەكشى ايبات شەگىپ, شاعىپ الۋعا ىڭعايلاندى. دەمەك, بۇل تىرشىلىك يەسىنىڭ وزدىگىنەن ادامعا دەگەن زيانى جوق ەكەندىگىن كورمەگە بارعان كوپشىلىك ءتۇسىندى.
جالپى, جەر بەتىندە ورمەكشىلەردىڭ 42 مىڭ ءتۇرى بار ەكەن. ستاتيستيكالىق دەرەكتەردە مىڭعا جۋىق ءتۇرى جويىلىپ كەتكەندىگى كورسەتىلگەن. دەگەنمەن كوبەيۋى تەز سەكىلدى. ۇرعاشى ورمەكشى ءبىر سالعاندا, 3 مىڭعا جۋىق جۇمىرتقا سالاتىن كورىنەدى. قورەكتەنۋى دە قىزىق. ءبىرى ازىعىن تور قۇرىپ اۋلاسا, ەندى ءبىرى جىرتقىش اڭداي اۋلاپ الادى. ءسويتىپ تىرشىلىگى جالعاسا بەرەدى. مىنە, تىرشىلىگى تابان استىنداعى ورمەكشىلەردىڭ ومىرىمەن اينالدىرعان ءبىر ساعاتتا-اق تانىسىپ شىقتىق.
وسكەمەن