قوستاناي وبلىستىق كاسىپكەرلەر پالاتاسىنىڭ جانىنان بۇرىننان بيزنەس سالاسىندا جۇرگەن, سونداي-اق كاسىبىن جاڭا باستاپ جاتقان ايەلدەرگە قارجىلىق ەمەس قولداۋ كورسەتەتىن ورتالىق اشىلدى.
مۇنداعى ماماندار كاسىپكەرلەردىڭ ءوتىنىشى بويىنشا بيزنەسكە تالداۋ جۇرگىزىپ, ونىڭ دامۋ الەۋەتىن انىقتاپ بەرە الادى. بيزنەس اشۋعا نيەتتى نەمەسە كاسىبىن كەڭەيتكىسى كەلەتىن ايەلدەر دە وسى ورتالىقتاعى ءتۇرلى ترەنينگتەر مەن سەمينارلارعا قاتىسۋ ارقىلى كاسىپكەرلىك سالاسىنداعى بىلىمدەرىن جەتىلدىرەدى.
ورتالىقتىڭ اشىلۋ سالتاناتىنا وبلىستىق كاسىپكەرلەر پالاتاسى وڭىرلىك كەڭەسىنىڭ توراعاسى ايداربەك حودجانازاروۆ قاتىسىپ, وبلىس ەكونوميكاسىندا ءوسىم بار ەكەنىن, وسىعان وراي ايەلدەر بيزنەسىنىڭ دە الەۋەتى جوعارى ەكەنىن ايتتى.
ال قوستاناي وبلىستىق كاسىپكەرلەر پالاتاسىنىڭ ديرەكتورى دانيار كۇزەنباەۆتىڭ پايىمىنشا, جۇمىسىن جاڭا باستاعان ورتالىق ايەلدەرگە شىعارماشىلىق جانە كاسىپكەرلىك مۇمكىندىكتەرىن ىسكە اسىرۋعا جاعداي جاسايدى.
پالاتا جانىنان جۇمىس ىستەيتىن ىسكەر ايەلدەر كەڭەسىنىڭ ءتورايىمى ەلەنا ۆەنگەرسكايا قازىر وڭىردە اۋىل ايەلدەرىنىڭ كوپتەپ كاسىپكەرلىكپەن اينالىسۋىنا جول اشاتىن ء«بىر اۋىل – ءبىر ءونىم» جوباسىنىڭ جۇزەگە اسىرىلىپ جاتقانىن ايتتى.
– ءبىز وبلىستىڭ ونشاقتى ءوڭىرىن ارالاپ, جاڭا كاسىپ اشقىسى كەلەتىن, بىراق ءىسىن نەدەن باستايتىنىن بىلمەي وتىرعان قىز-كەلىنشەكتەرمەن, جالعىزباستى انالارمەن كەزدەسىپ, اڭگىمەلەسىپ قايتتىق. اۋىلدىق ەلدى مەكەندەردە كوكونىس وسىرگىسى كەلەتىن, بالاباقشا اشقىسى كەلەتىن, سونداي-اق جەرگىلىكتى جەردە ءونىم شىعارعىسى كەلەتىن ايەلدەر كوپ. جاڭا كاسىپورىن پايدا بولسا, جاڭا جۇمىس ورىندارى اشىلاتىنى بارىمىزگە بەلگىلى. بالامەن ۇيدە وتىرعانىمەن, ءۇي شارۋاشىلىعىنان تىس ۋاقىتتا قوسىمشا تابىس تاۋىپ, ول ءىسىن ءسۇيىپ ىستەيتىن ەرمەگىنە اينالدىرىپ العان ايەلدەر دە از ەمەس. ولاردىڭ ءوز ءىسىن ءارى قاراي دامىتىپ, تۇراقتى كاسىپكە اينالدىرعىسى كەلەتىنىنە كوزىمىز جەتىپ وتىر. الايدا كوپ ايەلدەردىڭ جاڭا كاسىپ اشۋعا باستاپقى ءبىلىمى, ەرىك-جىگەرى جەتپەي قالىپ جاتادى. ولار جاڭا كاسىپ اشىپ, ونى ءارى قاراي دامىتىپ, اياقتان تۇرىپ كەتكەنشە قولداۋ كورسەتۋ كەرەك. ول ءۇشىن بارلىق اۋدان ورتالىقتارىندا وسىنداي قولداۋ ورتالىقتارى اشىلۋعا ءتيىس. سوندا عانا شالعاي وڭىرلەردەگى قاراپايىم ايەلدەر كاسىپكەرلىككە كوپتەپ بەت بۇرا باستايدى, – دەدى ە.ۆەنگەرسكايا.
ورتالىقتىڭ اشىلۋ راسىمىنە اۋىلدان كەلگەن كاسىپكەر ايەلدەر دە قاتىستى. مىسالى, التىنسارين اۋدانىنان كەلگەن جەكە كاسىپكەر ءجانيا جارمۇحامبەتوۆانىڭ اۋىلدا ءسان سالونى مەن بىرنەشە دۇكەنى بار.
– مۇنداي ورتالىقتىڭ ءىسىن جاڭا باستاپ جاتقان كاسىپكەرلەرگە عانا ەمەس, ءبىز سياقتى ساقا كاسىپكەرلەرگە دە كوپ كومەگى تيەدى. مىسالى, مەنى سوڭعى كەزدەرى كاسىبىمدى كەڭەيتۋ تۋرالى ماسەلە كوپ تولعانتىپ ءجۇر. ورتالىق ماماندارى تاياۋدا عانا ءبىزدىڭ اۋداننىڭ جەرگىلىكتى تۇتىنۋشىلىق الەۋەتى مەن مەنىڭ جەكە بيزنەسىمە سالىستىرمالى تالداۋ-ساراپتاما جاساپ, كاسىبىمدى قانداي باعىتتا دامىتۋعا بولاتىنى تۋرالى كوڭىلگە قونىمدى اقىل-كەڭەستەرىن ايتتى, – دەدى ىسكەر ايەل.
ايەلدەر كاسىپكەرلىگىن دامىتۋ ورتالىقتارى بۇگىندە ەلىمىزدىڭ 14 وڭىرىندە جۇمىس ىستەپ جاتىر.
قوستاناي وبلىسى